ცუდი დასაწყისი პარიზში

ქართველების სტარტის დღეც დადგა. თუმცა, ოთხი ჩვენებური სპორტსმენიდან მედალს ვერც ერთი შეწვდა… არადა, ამის იმედი ნამდვილად გვქონდა.

მოფარიკავე სანდრო ბაზაძე ოლიმპიადას ისევ სკანდალურად ემშვიდობება. თითქმის ანალოგიური სიტუაცია განმეორდა, რაც წინა, ტოკიოს თამაშებზე. ერთია, თუ მაშინ ქართველს ნახევარფინალში წააგებინეს, ამჯერად იგივე მერვედფინალში მოხდა. ბაზაძემ ეგვიპტელ მოჰამედ ამერთან 14:15 წააგო და მედლის გარეშე დარჩა. გადამწყვეტ მომენტში, როდესაც ანგარიში 14:14 იყო, მსაჯებმა ბოლო ქულა ეგვიპტელს მიაკუთვნეს. თუმცა სანდრო დარწმუნებული იყო, რომ ბოლო და გამარჯვების მომტანი ჩხვლეტა მის იყო.

ეს სირცხვილია, – დიდხანს ისმოდა ქართველი სპორტსმენის ხმამაღალი პროტესტი მსაჯების მიმართ, მაგრამ ამით არაფერი შეცვლილა…

მედალთან ყველაზე ახლოს ძიუდოისტი გიორგი სარდალაშვილი იყო. ჩვენებურმა მერვედფინალში ისრაელის წარმომადგენელი იამ ვოლჩაკი იპონით დასცა, მაგრამ მეოთხედფინალში, რომელიც თითქმის 13 წუთს გაგრძელდა, თურქ სალიჰ ილდიზთან წააგო და რეპეშაჟში გადაინაცვლა, სადაც მისი მეტოქე კორეელი ვონ ჯინ კიმი იყო, რომელიც ჩვენებურმა იოლად დაამარცხა, მაგრამ ბრინჯაოს მედლისთვის ესპანელ ფრანსისკო გარიგოსთან დამატებით დროში დამარცხდა და უმედლოდ დარჩა.

დღესვე პარიზის ოლიმპიურ თამაშებზე იასპარეზეს ჩვენი დელეგაციის ყველაზე უხუცესმა ნინო სალუქვაძემ (ტყვიის სროლა) და ყველაზე უმცროსმა ანა ნიჟარაძემ (ცურვა). სალუქვაძე, რომელიც ქართული სპორტის ლეგენდაა და მეათე ოლიმპიადაზე მონაწილეობს, პარიზში 10 მეტრიდან ტყვიის სროლაში მონაწილეობდა და 44 მონაწილეს შორის 38-ე ადგილი დაიკავა. 55 წლის სპორტსმენმა 562 ქულა დააგროვა და ლიდერს 20 ქულით ჩამორჩა. ცხადია, ქართველი სპორტსმენი მომდევნო ეტაპზე ვერ გადავიდა.

15 წლის ნიჟარაძისთვის კი პარიზში დებიუტი შედგა. ჩვენებურმა საკვალიფიკაციო ეტაპზე 100 მეტრზე ბატერფლაით ცურვაში რვა მონაწილეს შორის მეხუთე შედეგი აჩვენა – 1.02.86. რაც საბოლოოდ, 31 მონაწილეს შორის მხოლოდ 28-ე ადგილისთვის მომტანი აღმოჩნდა.

ხვალ ოლიმპიადაზე ვაჟა მარგველაშვილი (ძიუდო), გიორგი ყუშიტაშვილი (კრივი) და ნოე ფანცხავა (ცურვა) იასპარეზებენ.