დე ლაურენტისი: სპალეტი? ფრთებს ვერავის შევუკრავ

მიუხედავად იმისა, რომ კონტრაქტი 2024 წლამდე აქვს, ლუჩანო სპალეტიმ „ნაპოლიდან” წასვლა გადაწყვიტა — დარწმუნებულია „კორიერე დელო სპორტი”. გაზეთი ამტკიცებს, რომ ნეაპოლელთა სკუდეტოს შემოქმედი და მხედართმთავარი კლუბის პრეზიდენტ აურელიო დე ლაურენტისისგან გათავისუფლებას შეეცდება. ბიზნესმენსა და მწვრთნელს შორის დისტანცია გაიზარდა, ურთიერთობა გაცივდა. სახელმწიფო ზარაფხანის ოფისში გამართულ სკუდეტოს მედლების პრეზენტაციაზე პრეზიდენტმა თქვა:

„სპალეტი ნამდვილი ჩემპიონია, ჩემპიონები კი უნდა პოულობდნენ ადგილს, სადაც საკუთარ თავს საუკეთესოდ გამოხატავენ. მან ასეთი ადგილი ჩვენთან ნახა და ყველაფერი კარგად აეწყო. იმედი ვიქონიოთ, რომ მომავალში მას მიეცემა საშუალება, თავისი უნარი კიდევ უფრო კარგად გამოხატოს.

რასაკვირველია, ჯობს მან ეს „ნაპოლიში” გააკეთოს, მაგრამ ცხოვრებაში ყველაზე შეუფასებელი და აუწონავი საქონელი თავისუფლებაა. ფრთები არავის არასდროს უნდა შეუკრა. ეს არც მე უნდა გავუკეთო სხვას და არც სხვამ უნდა გამიკეთოს მე. ცხოვრებაში ხალხთან მჭიდრო ურთიერთობა უნდა შეინარჩუნო. მე ასეთი ურთიერთობა მაქვს ანჩელოტისთან, მაძარისთან, რეიასთან.

ბენიტესი? ძალიან მნიშვნელოვანი რამ გახლავთ მადლიერების გრძნობა. მათ მიმართ ვინც შენთვის გასცა და მათგან ვინც შენგან მიიღო”.