სამტრედიელთა აღმაფრენა

თბილისის ოლიმპიურ სასახლეში გაიმართა საქართველოს ხელბურთელ კაცთა ჩემპიონატის მორრიგი მატჩები. ზედიზედ მეორედ გაიმარჯვა „სამტრედიამ”. მან 36:34 დაამარცხა სპორტის უნივერსიტეტის გუნდი. „სტუ-იმედმა” კი 31:20 სძლია წყალტუბოს „პრომეთეს”.

სადღეისოდ, გუნდებს თამაშების არათანაბარი რაოდენობა აქვთ. ოთხ გუნდს 6 ქულა დაუგროვდა, ოღონდ „სამტრედიასა” და „იმედს” 5 თამაშის შემდეგ, ხოლო „ქუთაისსა” და „პეგასს” მათზე ორი მატჩით ნაკლები აქვთ ჩატარებული.

„სამტრედია” სპორტის უნივერსიტეტის გუნდთან მეორე ტაიმის დასაწყისში 6 ბურთით დაწინაურდა, მაგრამ სტუდენტებმა ანგარიში გაათანაბრეს — 33:33. და მაინც, თამაში სამტრედიელთა სასარგებლოდ დასრულდა: 34:36.

ახლა ჩემპიონატში რამდენიმედღიანი შესვენებაა. თამაშები 3 და 4 დეკემბერს ქუთაისის სპორტის სასახლეში გაგრძელდება, სადაც „ქუთაისი” და ბათუმის „შავი ზღვის ბიჭები” თბილისის „პეგასსა” და „გორს” შეხვდებიან. პირველი წრე 18 დეკემბერს დასრულდება.

შეგახსენებთ, რომ საქართველოს ჩემპიონატი სამწრიანი რეგულარული ნაწილისგან და ფინალური ოთხეულის შეხვედრებისგან შედგება. ფინალური ოთხეული ნახევარფინალებს, მესამე ადგილისთვის მატჩსა და ფინალს ითამაშებს.