საბერძნეთის ჩემპიონატი ყოველთვის გამოირჩეოდა „მხიარული“ მოვლენების სიუხვით, მაგრამ ბოლო პერიოდში ნამეტანი ხდება – ქვეყნის სპორტის სამინისტროს გადაწყვეტილებით, ეროვნული პირველობა გაურკვეველი ვადით გადაიდო, ვიდრე ხელისუფლება, საფეხბურთო ლიგა და ფეხბურთის ფედერაცია უსაფრთხოების გაცილებით მაღალ სტანდარტებს არ შეათანხმებენ.
ყველაფერი პაოკისა და საჩემპიონო ბრძოლაში მისი კონკურენტის – აეკის მატჩით დაიწყო. ბოლო წუთზე მასპინძელმა ვარელამ ანგარიში გახსნა. არბიტრმა თავიდან ხელი ცენტრისკენ გაიშვირა, თუმცა მალევე გადაწყვეტილება შეცვალა და გოლი გააუქმა – თამაშგარე დააფიქსირა. ამით აღშფოთებული პაოკის რუს-ბერძენი ბოსი ივან სავიდი, ვინც საქართველოში არის დაბადებული, დაცვის თანხლებით და იარაღით შეუვარდა არბიტრს მოედანზე.
საბერძნეთის ჩემპიონატი ადრე თუ გვიან განახლდება, მაგრამ ვანია სავიდის საჩემპიონო ამბიციამ ჩაილურის წყალი დალია – ამბობენ, სანქციები უმკაცრესი იქნებაო.
