ქოჩორას პასი ილუზიონისტის ქუდიდან

როგორც ვალენსიური plazadeportiva წერს, ლა ლიგა 2-ის გუნდების „ეიბარისა” და „ლევანტეს” თამაშს ორი ნაწილი ჰქონდა, კარგი და ცუდი. პორტალის აზრით ვალენსიურმა გუნდმა პირველი ტაიმი კარგად ჩაატარა, მეორე კი ცუდად. თუმცა მაშინაც კი, როდესაც ის აგონიაში იყო, მისმა ფეხბურთელებმა ერთი ჩინებული კომბინაცია გაითამაშეს და მეორე გოლი გაიტნეს, რასაც ქვემოთ, ვიდეოში ნახავთ. შეხვედრა 2:2 დასრულდა. „ლევანტე” ორჯერ იგებდა. პირველი გოლი ვალენსიელებმა გიორგი ქოჩორაშვილის ბრწყინვალე პასით გაიტანეს.

plazadeportiva-მ „ლევანტეს” ფეხბურთელთა შორის ერთ-ერთი ყველაზე მაღალი შეფასება ქართველ ნახევარმცველს დაუწერა – 7,5. „ქოჩოს” თამაშის სიტყვიერი აღწერა კი ასეთი გახლდათ: „ის საუკეთესო იყო. პირველი გოლის დროს ილუზიონისტის ჩანთიდან ჯადოსნური პასი ამოაძრო. ახალ სეზონში ქართველი თანაგუნდელთა შორის ერთ-ერთი საუკეთესოა. „იპურუაზე” მან ახალი დიაპაზონი გვაჩვენა, ყველგან იყო. გარდა ამისა თავის თამაშს დაამატა ისეთი ნაპერწკალი, რომელიც გასულ სეზონში არ ჰქონდა. ქოჩორაშვილი სწორედ ის ნახევარმცველია, რომელმაც ევროპის ჩემპიონატზე საყოველთაო ყურადღება მიიპყრო”.