დინამო პირველზე გადადიოდა…

„დინამომ“ გალიდერების შანსი „გაგრასთან“ გაანიავა

ეროვნული ჩემპიონატის მე-12 ტურში, ლიდერმა „ბათუმმა“ შინ „დილასთან“ 0:2 წააგო (ეს ბათუმელთა პირველი მარცხი გახლდათ მიმდინარე სეზონში) და უშუალო მდევარ „დინამოს“ ერთპიროვნულად გალიდერების შანსი მისცა, თუმცა გიორგი ჭიაბრიშვილის ბიჭებმა ერთ-ერთ აუტსაიდერ „გაგრას“ ვერ მოუგეს (0:0). ეგ კი არა, მეორე საფეხურიც „სამგურალს“ დაუთმეს.

„დილა“ შესანიშნავ ფორმაშია, ზედიზედ სამი მატჩი მოიგო, თან ვისთან: „დინამოსთან“ – 2:1, „ტორპედოსთან“ – 5:0 და „ბათუმთან“ – 2:0…

„სამგურალი“ კი რეკორდებს ამყარებს. გიორგი ჭელიძის შეგირდებმა მიჯრით 6 შეხვედრა მოიგეს და მეორე ადგილზე დადგნენ, თან ლიდერ „ბათუმს“ ქულებით გაუთანაბრდნენ. ამჯერად მათ სტუმრად „თელავი“ დაამარცხეს (1:0).

მომდევნო ტურში კი, 10 მაისს, „დინამოს“ უმასპინძლებენ წყალტუბოში. წესით, საინტერესო შეხვედრა უნდა გამოდგეს.

ყოჩაღობს ომარ თეთრაძის „საბურთალოც.“ ბოლო ხუთ ტურში მათ 4 მატჩი მოიგეს (ერთი ფრე). ამჯერად დრამატულ შეხვედრაში დაამარცხეს „შუქურა.“ ჯერ 2:0 იგებდნენ, შემდეგ ზღვისპირელებმა გაათანაბრეს ანგარიში, მაგრამ ბოლოს მაინც გაიმარჯვეს ლუკა სილაგაძის გოლით – 3:2.

„ტორპედომ“ გამარჯვების გემო გაიხსენა. ზედიზედ ორი გამანადგურებელი მარცხის შემდეგ („დილასთან“ – 0:5, „საბურთალოსთან“ – 0:3), იმერულ დერბიში „სამტრედია“ მინიმალური ანგარიშით დაამარცხა. თამაში სამტრედიაში გაიმართა, მაგრამ „მასპინძელი“ „ტორპედო“ იყო.

დაბოლოს, თუ წინა ტურში სეზონში ყველაზე მეტი – 20 გოლი გავიდა, ამჯერად ყველაზე ნაკლები – 9.

შუქურა 2:3 საბურთალო (ბათუმში)

0:1 სილა (23), 0:2 ტაბატაძე (58 პენ), 1:2 მუჯირი (69), 2:2 სარდალიშვილი (72), 2:3 სილაგაძე (85)

ბათუმი 0:2 დილა

0:1 სილვა (69), 0:2 კოვტალიუკი (86)

გაძევება: ღუდუშაური (61) – ბათუმი

ტორპედო 1:0 სამტრედია (სამტრედიაში)

1:0 ქობულაძე (70)

თელავი 0:1 სამგურალი

0:1 ჩიხრაძე (86)

დინამო 0:0 გაგრა (გორში)

[table id=42 /]

მეგოლეები: ჯოვინო ფლამარიონი (ბათუმი), ზორან მარუშიჩი (დინამო) – 7, ტიერი გეილი (დილა) – 6, შეიკნე სილა, ლუკა სილაგაძე (ორივე – საბურთალო) – 5

ავტორის პროფილი

სოლომონ გულისაშვილი: სოლომონ გულისაშვილი — ადამიანი, რომელიც ვერ ჩქარობს, განსაკუთრებით თუკი სტატიას წერს, ასწორებს ან ქეიფობს. ამ ორ სფეროში უბადლოა. ერთგული ადამიანია, სამი შვილის მამა. თუ გინდა არ გაგაგიჟოს, დრო არ უნდა დაუთქვა.