ხვიჩასთავის კარგად დაცდილი მსაჯი

„ლივერპულისა’’ და „პარი სენ ჟერმენის’’ შეხვედრის მსაჯად იტალიელი მაურიციო მარიანი დანიშნეს.

მარიანი 44 წლისაა. მას ჩემპიონთა ლიგაში 17-მატჩიანი გამოცდილება აქვს, რომელთაგან ექვსს ის მიმდინარე სეზონში გაუძღვა. მან იმსაჯა ჯგუფურ ეტაპზე „ლივერპულისა’’ და „ატლეტიკოს’’ მატჩი (3:2). ის იყო აგრეთვე მიუნხენში „ბაიერნისა’’ და პსჟ-ს შეხვედრის (1:2) არბიტრი. ეს ის თამაშია, რომელშიც რომაელმა მსაჯმა არშაფ ჰაკიმის წინააღმდეგ უხეშობისთვის ლუის დიასი გააძევა.

გასულ სეზონში მარიანი გაუძღვა „პარი სენ ჟერმენისა’’ და „ასტონ ვილას’’ მეოთხედფინალური შეხვედრას (3:1), რომელშიც ხვიჩა კვარაცხელიამ საუცხოო გოლი გაიტანა.

იმავე წელიწადს მან საყოველთაო ყურადღება მიიპყრო როდესაც „მონაკოსა’’ და „ბენფიკას’’ შეხვედრაში მონაკოელი მოტასემ ალ-მუსრატი მოედნიდან გააგდო. მიზეზი: უხეში თამაშის გამო მან ჟესტით მოწინააღმდეგის გაგდება მოითხოვა.

მიმდინარე სეზონი მარიანისთვის რთულია. ადრეულ შემოდგომაზე იტალიის ფეხბურთის ფედერაციამ ის მცირე ხნით სერია A-დან მოკვეთა, რადგან „ნაპოლისა’’ და „ინტერის’’ (3:1) მატჩში შეცდა – როდესაც ჰენრიკ მხითარიანი ჯოვანი დი ლორენცოს საჯარიმოში ოდნავ შეეხო და ნეაპოლელი წაიქცა, თერთმეტმეტრიანი დანიშნა. მაშინ იტალიურმა მედიამ მარიანი მკაცრად გააკრიტიკა. Corriere dello Sport-მა დაწერა, რომ რომაელი არბიტრი ქვეყნის ფეხბურთში ერთ-ერთ ყველაზე წინააღმდეგობრივ ფიგურად რჩება, მაგრამ ფიფამ ის მსოფლიოს ჩემპიონატზე მიიწვია.

„ლივერპულისა’’ და პსჟ-ს შეხვედრაში თანამსაჯები იქნებიან იტალიელები დანიელე ბინდონი და ალბერტო ტეგონი, მეოთხე მსაჯად კი მატეო მარკეტი დადგება. VAR-ს მიხედავენ მარკო დი ბელო და ალესანდრო დი პაოლო.

„პარიზიენი’’ მსაჯობის თემას განავრცობს და წერს, რომ ერთი კვირის წინ, მეოთხედფინალის პირველ შეხვედრაში მსაჯებმა ორი საკამათო გადაწყვეტილება მიიღეს: პსჟ-ს სასარგებლოდ ორი პენალტი არ დანიშნეს.