კვერნაძე და ფროზინონე მეთექვსმეტედფინალში გავიდნენ

გიორგი კვერნაძის „ფროზინონემ” იტალიის თასის 1/32 ფინალში „პიზას” 1:0 მოუგო და შეჯიბრებას აგრძელებს. შეხვედრის ერთადერთი გოლი მე-7 წუთზე სიმონე კანესტრელიმ თავის კარში გაიტანა. პირველ ტაიმში მეტოქეს „ფროზინონე” სჯობდა, შესვენების შემდეგ კი „პიზამ” ანგარიშის გასათანაბრებლად ძალები მოიკრიბა — მომენტები ჰქონდა, მაგრამ მიზანს ვერ მიაღწია.

გიორგი კვერნაძე მოედანზე 66-ე წუთზე შევიდა. ქართველი მარცხენაფლანგელი თამაშში კარგად ჩაერთო, რამდენჯერმე სახიფათო შეტევაც წამოიწყო. ერთ ეპიზოდში მისი დარტყმის შემდეგ „ფროზინონეს” გოლის გატანა შეეძლო, მაგრამ გიორგის თანაგუნდელებს დამატებისას სიზუსტე დააკლდათ.