ბელგიის ნაკრებთან მატჩისას (2:2) მიღებული ტრავმის გამო, ევროპის ჩემპიონატზე საქართველოს ნაკრებს საყრდენი ნახევარმცველი ნიკა გაგნიძე ვეღარ დაეხმარება – ამის შესახებ პრესკონფერენციაზე ახალგაზრდული ნაკრების მწვრთნელმა რამაზ სვანაძემ განაცხადა.
„სამწუხაროა, რომ ნიკა გაგნიძე ევროპის ჩემპიონატზე ვეღარ დაგვეხმარება, მაგრამ ის გუნდთან ერთად რჩება – ნიკა ამ ნაკრების გულია, როგორც მოედანზე, ისე მის მიღმა.
შეიძლება ბევრმა არ იცის, რომ მან თურქეთში საკმაოდ კარგ კონტრაქტზე უარი თქვა, რადგან იქ სათამაშო პრაქტიკა ნაკლებად ჰქონდა და გორის „დილაში“ დაბრუნდა იმის გამო, რომ ევროპის ჩემპიონატისთვის ფორმაში ყოფილიყო და ამ ტურნირზე ეთამაშა“, – განაცხადა სვანაძემ.
შეგახსენებთ, რომ ბელგიასთან მატჩში ნიკა გაგნიძემ მეტოქესთან ორთაბრძოლისას ტრავმა მიიღო და შესაცვლელი გახდა. გამოკვლევების შემდეგ გაირკვა, რომ ფეხბურთელი სერიოზულ ტრავმას გადაურჩა, თუმცა რეაბილიტაციისთვის დაახლოებით ერთ თვეზე მეტი დასჭირდება.
