– გამიგონე, რუსებს რა დაემართათ?
– ყველაფერი ცხელი ჩაის ბრალია.
– ჩაი რა შუაშია? ბრაზილიასთან წაგებაზე ვამბობ.
– ბრაზილიასთან ისედაც წააგებდნენ. შენ ალბათ ოთხი ბურთით წაგებას ამბობ.
– დიახ.
– ჰოდა ჩაის ბრალია.
-როგორ?
-ბიშოვეცს ცხელი ჩაი დაულევია თამაშის წინ, პირი დასწვია და ფეხბურთელებს ვეღარაფერი უთხრა.
– აბა, მოიგონებ ხოლმე. ბურთი რომ შენს კარში არ უნდა შეაგდო, იმას რა თქმა უნდა?
– ნდომებია, ხომ ხედავ.
– და ბიშოვეცს რომ თქმა შეძლებოდა, რა მოხდებოდა?
– რუსეთი ღირსეულად წააგებდა.
– ღირსეული წაგება რას ნიშნავს?
– ოო, ეგ ქართული ხალხური ტერმინია და ახლა რუსებმაც შეისწავლეს.
– და რას ნიშნავს?
– აუცილებლად უნდა წააგო, ოღონდ შენს გულშემატკივრებზე უნდა გაბრაზდე, რატომ წარმოიდგინეთ, რომ უნდა მოგვეგოო.
– არა მგონია მხოლოდ ცხელი ჩაის ბრალი იყოს. კომენტატორმა თქვა, რუსებმა ცხრამეტი საათი იფრინეს ბრაზილიაში ჩასასვლელად და დაიღალნენო.
– ბრაზილიამაც ცხრამეტი საათი იფრინა მოსკოვამდე და მერე სამით ნოლი მოიგო.
– ეგ როდის იყო?
– ძველ დროში.
– მაშინ პელე ეყოლებოდათ და მოიგებდნენ, აბა რა?
– მაგას რა მნიშვნელობა აქვს? ახლა რივალდო ჰყავთ.
– და რივალდო პელეს გაუტოლდება?
– შენ ფეხბურთი არ გესმის და ნუ მაწვალებ.
– არ გაწვალებ. უბრალოდ, მაინტერესებს, რა აზრი ჰქონდა რუსების ბრაზილიაში ჩასვლას?
– რა აზრი აქვს, ინგლისი და გერმანია რომ ჩამოდიან და სტადიონზე მიდიხარ?
– ეს ბოროტი შეკითხვაა. ეროვნულ გრძნობას დასცინი.
– არა, ბატონო, მე ფეხბურთს დავცინი.
– რა აქვს ფეხბურთს შენი დასაცინი?
– თუნდაც ის, რომ მინდორზე რომ მოკბეჩილ ბუბლიკს გადმოაგდებენ, მასპინძელ გუნდს წაგება ეთვლება.
– ბუბლიკს კი არა, ბომბებს ისვრიან…
– და მასპინძელი გუნდი რა შუაშია? ედმუნდომ და ბატისტუტამ უთხრეს, გადმოაგდეო?
– აბა, რა ვქნათ?
– ფეხბურთი არაფერშუაშია. პოლიციის ბრალია. დაუქვითონ ხელფასი პოლიციას, გუნდი კი გაატარონ.
– ეს სადაური სამართალია?
– ადამიანური. პრარაბს ცემენტი დაენანა, ტრიბუნა ჩაინგრა და გუნდი უნდა გააგდო?
– იქ ფანებმა იჩხუბეს. თოფი ისროლეს.
– კენი დალგლიშმა ისროლა?
– არა.
– აბა, ბობ პეისლიმ?
– ეგრე ლაპარაკი არ შეიძლება. ხალხი დაიხოცა.
– მართალია, მაგრამ, როცა „ლივერპულის“ ფანებმა „იუვეს“ ტიფოზებს დასცხეს, ტრიბუნა ჩაინგრა. რა შუაშია აქ „არსენალი“ და „დერბი“?
– შენ მაგას იმიტომ ამბობ, რომ იტალიელები არ გიყვარს.
– მე არ მიყვარს, როცა კაცი მაშხალას გამოისვრის და ამის გამო „გრასჰოპერი“ „ფიორენტინას“ დაამარცხებს.
– რას იზამ? ვიღაცა ხომ უნდა დაისაჯოს?
– ვიღაცა დაისაჯოს, ფეხბურთელი კი არა.
– და გაზა?
– რა გინდა ამ წესიერი და საწყალი კაცისგან?
– არ არის დასასჯელი?
– გრობელაარი ვერ დასაჯეს და გაზა უნდა დასაჯონ?
– გაზა ყოველდღე დასასჯელია.
– რატომ?
– ათი წელიწადია ცუდად იქცევა.
– სიმეონეზე ცუდად იქცევა?
– ეგ ფეხბურთს არ თამაშობს. ეგ მუსკომედიის მსახიობია.
– რა გინდა, რას მერჩი?
– ჩემს ოჯახში მაგ კაცის გვარი აღარ ახსენო, თორემ…
21.11.1998