რონალდუმ თავის გატეხვა ამჯობინა

გუშინღამ ესპანური პრიმერას მორიგ ტურში მადრიდის “რეალი” ლა კორუნიას “დეპორტივოს” ერთობ არასტუმართმოყვრულად დაუხვდა და 23-ე წუთზე ადრიანის გატანილს ერთბაშად შვიდით უპასუხა. მთავარი ეს არ იყო. როგორც იქნა კრიშტიანომ ნავსი გატეხა და გაიტანა. თანაც – ერთბაშად ორი. აქამდე პორტუგალიელს სეზონში ოდენ ოთხჯერ გაეტანა და თანაგუნდელ ბეილისაც ჩამორჩება, რომელმაც ჯამში რონალდუზე 640 წუთით ნაკლები გაატარა მოედანზე.

პორტუგალიელი იმდენად მოტივირებული იყო, რომ მეორე გოლისას (6:1 გახადა), ულამაზეს თავურს რომ მოჰყვა, სტუმართა მცველმა შერმა ხუთგზის ოქროსბურთოსანს უნებლიე წიხლი შეჰკადრა და წარბი გაუხეთქა . რონალდუს მოედნის დატოვება მოუხდა. ამ დუბლით პორტუგალიელმა ეგებ გაულღვოს გულები მადრიდელებს, რომელთა 70%- ზე მეტი მისი გუნდიდან გაშვების წინააღმდეგი სულაც არაა.

ცნობისათვის: “რეალის” დარჩენილი ხუთი გოლიდან ერთი მოდრიჩმა, ორ-ორი კი ნაჩომ და იმავე ბეილმა გაიტანეს, რომელიც მატჩში საუკეთესოდ ცნეს.

ავტორის პროფილი

გიორგი ნოზაძე: მას შეეძლო, დილის 11 საათისთვის გაზეთის ორი გვერდი მზად ჰქონოდა და გადაერეკა თანამშრომლებისთვის - ნუ შეწუხდებით, სამსახურში ნუღარ მოხვალთ, საქმე გაკეთებულია. ფეისბუკის ნამდვილი ფეისი. ის გახლავთ სოციალურ ქსელში "მოამბეც" და "ვრემიაც".