რობერტ ლევანდოვსკიმ ერთ სეზონში 40 გოლი გაიტანა! უფრო სწორედ, მეორმოცე… რადგან წინ კიდევ კიდევ არის თამაში. „ბაიერნი” შინ „აუგსბურგს” შეხვდება.
„შპორტ ბილდი“ წერს, რომ პოლონელის მეორმოცე გოლი („ბაიერნმა” ფრაიბურგში 2:2 ითამაშა) ულამაზო იყო, რადგან მან პენალტი დაარტყა. სამაგიეროდ, ის იყო ისტორიული — 2020 წლის მსოფლიოს საუკეთესო ფეხბურთელმა ლეგენდარული გერდ მიულერის 1971-72 წლების შედეგი გაიმეორა. შედეგი, რომელიც მე-20 საუკუნეში ვერავინ გააუმჯობესა.
ლევანდოვსკიმ დიდი მიღწევა ასე იზეიმა: მაისურა აიწია და გამოაჩინა ქვედა მაისურაზე წარწერილი 4ever Gerd (მარადის გერდ!).
„რეკორდმაისტერის” მთელი სათადარიგოთა სკამი წამოდგა და 32 წლის ვარსკვლავს დერეფანი გაუკეთა.
„მე მივაღწიე მიზანს, რომლის წარმოდგენა ძნელი იყო, — დაწერა ტვიტერზე ლევანდოვსკიმ შეხვედრის შემდეგ, — ამიტომაც წარმოუდგენლად ბედნიერი ვარ. „ბაიერნისთვის” ახალი ისტორია დავწერე და შევქმენი ამბავი, რომელსაც გულშემატკივრები შვილებს მოუყვებიან. გავყევი ისეთი ლეგენდების ნაკვალევს, როგორიც იყო გერდ მიულერი”.
რობერტ ლევანდოვსკი ხუთჯერ იყო ბუნდესლიგის საუკეთესო ბომბარდირი: 2014, 2016, 2018, 2019, 2020. აქამდე, მისი საუკეთესო შედეგი გახლდათ ერთ სეზონში 34 გოლი.
ერთი კვირის წინ, როდესაც ბავარიელებმა მიონხენგლადბახის „ბორუსიას” 6:0 მოუგეს და ლევანდოვსკიმ ჰეთ-თრიკი შეასრულა, მას მოახლოებული რეკორდის შესახებ ჰკითხეს.
„წარსულის შედეგები არაფერს ნიშნავს, თუკი შენ დაუოკებელი ლტოლვა გაქვს”, — უპასუხა მსოფლიოს საუკეთესო ფეხბურთელმა.
ახლა, ლევანდოვსკის ბუნდესლიგაში 276 გოლი აქვს გატანილი. ის ამ მაჩვენებლით მეორეა — კვლავ გერდ მიულერს ჩამორჩება: მიულერის შედეგი 365 გოლია.
