„დინამოს“ 10 ტური აღარ წაეგო. ბოლოს კახი კაჭარავას გუნდს ლიდერმა „საბურთალომ“ მოუგო 17 ივნისს. და, აი კერკეტმა „დილამ“ უმნიშვნელოვანესი ქულები დააკარგვინა ლიდერის უშუალო მდევარს. ერთადერთი ბურთი მიკოლა კოვტალიუკმა გაიტანა 74-ე წუთზე. უკრაინელს ჯამში 15 გოლი მოუგროვდა და მხოლოდ ერთით ჩამორჩება მთავარმეგოლე გიორგი გაბედავას.
„დინამოს“ წაფორხილებით ვერც „საბურთალომ“ ისარგებლა და შინ ერთ-ერთ მებოლოვე „სამტრედიას“ დაუზავდა. ამისდაკვალად, საბურთალოელებმა ბოლო ოთხ ტურში შესაძლო 12-დან, მხოლოდ 4 ქულა მოიპოვეს, რაც ჩემპიონობის მაძიებელი გუნდისთვის ძალიან ცუდი შედეგია.
ზედიზედ სამი მოგების შემდეგ (ამათგან ორი 3:0), „ტორპედომ“ აუტსაიდერ „კოლხეთს“ ვერაფერი მოუხერხა. ახლა ქუთაისელებს გამოტოვებული მატჩების დროც დაუდგათ. ქუთაისელები „დილას“, „ლოკომოტივსა“ და „დინამოს“ შეხვდებიან. საინტერესოა, რომ ოთხდღიან მონაკვეთში „ტორპედოს“ შინ და სტუმრად ორჯერ უწევს „დილასთან“ შეხვედრა.
„ჩიხურამ“ წინა ტურში „საბურთალოსთან“ საშინაო მარცხის შემდეგ, ხასიათი ოდნავ გამოიკეთა. სტუმრად „სიონს“ სძლია და უმნიშვნელოვანესი ქულები მოიპოვა.
ტურის ბოლო შეხვედრაში კი, მიხეილ მესხის სათადარიგო მინდორზე, „რუსთავი“ „ლოკომოტივს“ დაუზავდა. ეს რუსთველთა მიჯრით მეოთხე ფრე გახლდათ. ამავე შეხვედრაში რკინიგზელმა დავით ჯიქიამ უკვე მე-19 წამზე გახსნა ანგარიში. თუმცა მეორე ტაიმის დასაწყისში გიორგი პაპავამ გაათანაბრა.
ამით ელიგის მესამე წრე დასრულდა. თუმცა უახლოესი ტური უკვე მომავალ პარასკევს დაიწყება და კვირას დამთავრდება.
სხვა მხრივ, 27-ე ტურში ძალიან ცოტა – მხოლოდ 8 გოლი გავიდა. ასეთივე მაჩვენებელი გახლდათ 25-ე და 22-ე ტურებშიც…
27-ე ტური: კოლხეთი 0:0 ტორპედო, დილა 1:0 დინამო, სიონი 1:2 ჩიხურა, საბურთალო 1:1 სამტრედია, რუსთავი 1:1 ლოკომოტივი
| გუნდი | თამაში | მოგება | ფრე | წაგება | ბურთები | ქულა |
|---|---|---|---|---|---|---|
| საბურთალო | 36 | 24 | 7 | 5 | 64:29 | 79 |
| დინამო | 36 | 21 | 6 | 9 | 73:38 | 69 |
| ტორპედო | 36 | 20 | 9 | 7 | 66:25 | 69 |
| ჩიხურა | 36 | 19 | 7 | 10 | 54:33 | 64 |
| დილა | 36 | 17 | 12 | 7 | 60:40 | 63 |
| ლოკომოტივი | 36 | 12 | 8 | 16 | 43:55 | 44 |
| რუსთავი | 36 | 8 | 13 | 15 | 33:44 | 37 |
| სიონი | 36 | 8 | 7 | 21 | 39:65 | 31 |
| სამტრედია | 36 | 4 | 9 | 23 | 28:81 | 21 |
| კოლხეთი | 36 | 4 | 8 | 24 | 26:76 | 14 |
კოლხეთს დაკლებული აქვს 6 ქულა
28-ე ტური. 5 ოქტომბერი: კოლხეთი – ჩიხურა
6 ოქტომბერი: სიონი – საბურთალო, სამტრედია – ლოკომოტივი
7 ოქტომბერი: რუსთავი – დინამო, დილა – ტორპედო
მეგოლეები: გიორგი გაბედავა (ჩიხურა) – 16, მიკოლა კოვტალიუკი (დილა) – 15, ლეანდრო რიბეირო (დილა) – 13, ბუდუ ზივზივაძე (დინამო) – 12, ოთარ კიტეიშვილი (დინამო/შტურმი ავსტრია) – 11, მამია გავაშელიშვილი (ლოკომოტივი), ვაგნერ გონსალვეში (საბურთალო), ლევან კუტალია (ტორპედო) – 9
