ოფიციალურ განცხადებაში წერია: „საქმეში არსებული ყველა მტკიცებულების შეფასების შედეგად ფიფას სააპელაციო კომიტეტის თავმჯდომარემ გადაწყვიტა, რომ მექსიკური კლუბები „პაჩუკა’’ და „ლეონი’’ მულტიკლუბური მფლობელობის კრიტერიუმებს არ შეესაბამებიან…
…ფიფას 2025 წლის კლუბური მსოფლიოს თასის რეგლამენტის მე-10 პუნქტის მე-4 პარაგრაფის შესაბამისად „ლეონი’’ შეჯიბრებაში მონაწილეობას ვერ მიიღებს’’.
ფრაზამ „მულტიკლუბური მფლობელობის კრიტერიუმები’’ რომ არ დაგვაბნიოს, მარტივად ვთქვათ: „ლეონი’’ და „პაჩუკა’’ ერთი და იმავე კაცის კლუბები ყოფილა. ეს კაცი გახლავთ ხესუს მარტინეს მურგუია, რომელიც „მაჩუკა ჯგუფის’’ თავმჯდომარეა, ეს ჯგუფი კი „ლეონსაც’’ ფლობს. საინტერესოა, რომ კლუბი „პაჩუკაც’’ მსოფლიოს ჩემპიონატის მონაწილეა, მაგრამ ის შეჯიბრებიდან არ მოკვეთეს.
„ლეონმა’’ ფიფას გადაწყვეტილების გასაჩივრება გადაწყვიტა. ის აცხადებს, რომ ბოლო თვეების განმავლობაში წარადგინა ყველა საჭირო საბუთი, რომელთა თანახმადაც ეკონომიკური, ადმინისტრაციული და სპორტული თვალსაზრისით შეჯიბრებას სრულიად შეესაბამება.
მსოფლიოს ჩემპიონატამდე 12 კვირა დარჩა. თუ „ლეონის’’ პროტესტმა არ გაჭრა, მაშინ შეჯიბრებაში რაღაცები შეიცვლება. „ლეონი’’ წილისყრის თანახმად განწესებული იყო ჯგუფში: „ჩელსი’’, „ფლამენგო’’ და „ესპერანსი’’ (ტუნისი). უახლოეს მომავალში ფიფა ახალ მონაწილეს დაასახელებს და იტყვის იმ კრიტერიუმებსაც, რომელთა მიხედვითაც მას შეარჩევს.
საინტერესოა, იმის შესახებ, რომ „პაჩუკა’’ და „ლეონი’’ ერთი კაცის გუნდები იყო ფიფამ მხოლოდ ახლა გაიგო?
