„პარი სენ ჟერმენის’’ 19 წლის შემტევი დეზირე დუე საფრანგეთის ნაკრებში პირველად გამოიძახეს, რის გამოც ის საყოველთაო ყურადღების ცენტრში მოექცა. ქვეყნად არ მოიძებნება მისი ასაკის ბევრი ფეხბურთელი, რომელსაც ლიგა 1-ის გარდა ჩემპიონთა ლიგაშიც აქვს ნათამაშევი. პროფესიული მხარის გარდა, საფრანგეთის ნაკრებში გამოძახებულმა ყმაწვილმა ყურადღება ჟურნალისტებთან ლაღი ურთიერთობით მიიპყრო.
ფრანგებს ასეთი ტრადიცია აქვთ: ეროვნული გუნდის დებიუტანტს პრეს-კონფერენციაზე მიიყვანენ ხოლმე. როგორც გაირკვა დეზირე დუესთვის მედიასთან ლაპარაკი პრობლემას საერთოდ არ წარმოადგენდა. ანჟერში დაბადებულმა ფეხბურთელმა კითხვა-პასუხში მონაწილეობის ნიჭი გამოაჟღავნა და რამდენიმე რთულ კითხვასაც იოლად გაართვა თავი. ფრანგულ პრესაში დაწერეს, რომ მან ორატორული თვისებები კილიან მბაპესგან ისესხა.
ჟურნალისტმა რომენ ბედუკმა Ici Paris Ile-de-France-ის ეთერში დუეს სიმშვიდესა და სიმწიფეს გაუსვა ხაზი.
„შეგახსენებთ, რომ დეზირე დუე მხოლოდ 19 წლისაა, მაგრამ როდესაც მას მედიის წინაშე ვხედავთ, გვრჩება შთაბეჭდილება, რომ სხვებზე ერთი ნაბიჯით წინ არის; ისევე, როგორც მოედანზე. ამით ის მბაპეს მოგვაგონებს. მბაპე კითხვებს ყოველთვის ბუნებრივად პასუხობს და იუმორსაც ურევს. როგორც ჩანს დუე იმავე სკოლაში სწავლობდა. ეს ძალიან კარგად გამოჩნდა ნაკრების პრეს-კონფერენციაზე, თუმცა იმავეს შემჩნევა ადრეც შეიძლებოდა, პსჟ-ს თამაშების დროს მიქს-ზონებში, სადაც ის ყოველთვის სიამოვნებით მიდის ხოლმე’’, – თქვა მან.
