ვის შეუძლია დღეს „პარი სენ ჟერმენის’’ გაჩერება? ეს პრემიერლიგის ლიდერმა „ლივერპულმაც’’ კი ვერ შეძლო. ლიგა 1-ში „მარსელს’’ „პარკ დე პრენსზე’’ პარიზელთა დამარცხებისთვის სასწაული სჭირდებოდა, რომელიც არ მოხდა. პსჟ-მ 3:1 მოიგო, დამარცხებული გუნდის იტალიელმა მწვრთნელმა რობერტო დე ძერბიმ კი ასე თქვა:
„თქვენ ამას კლასიკოს ეძახით, მაგრამ გუნდების შედარება კლუბების ეკონომიკური სიძლიერიდან გამომდინარე შეუძლებელია. კლასიკო ისაა, როდესაც ორი მხარე ერთმანეთს ებრძვის, ერთი რომ დარტყმას მიაყენებს, მეორე უპასუხებს. მე მიყვარს კონკურენცია, ზეწოლის ქვეშ ყოფნა, მაგრამ პარიზსა და მარსელს შორის ასეთი რამ არ არის. შეიძლება გიჟი დამიძახოთ, მაგრამ მე მოვლენებს ასე ვხედავ. სინამდვილეში არანაირი კონკურენცია არ არსებობს’’.
Maxifoot წერს, რომ კოლეგის ასეთი ნათქვამი „პარი სენ ჟერმენის’’ ესპანელ თავკაც ლუის ენრიკეს არ ესიამოვნა. მან უპასუხა:
„ორი აზრი არ არის, რომ პსჟ დიდი ეკონომიკური შესაძლებლობების კლუბია, რაც ძალიან მომწონს. მე შემიძლია ნებისმიერი ფეხბურთელი დავიმატო და ეს რომ მაშფოთებდეს უცნაური იქნებოდა. ხოლო მათ, ვისაც ასეთი ვითარება არ მოსწონს ვეტყოდი, რომ სამწუხაროა, მაგრამ ეს ფეხბურთია. ჩვენ გვინდა კონკურენტუნარიანი გუნდი გვყავდეს, საუკეთესოები დავამარცხოთ და ისტორია შევქმნათ. ამისათვის საჭიროა ფული, ძლიერი ფეხბურთელები და კარგი სათამაშო გეგმა. ბუნებრივია, რომ ბევრს ამ განსხვავების დანახვაზე შურის გრძნობა უჩნდება, მაგრამ ვიმეორებ, ფეხბურთის სამყარო ასეა მოწყობილი. დღეს ფინანსურად ძლიერი გუნდები დომინირებენ, ჩვენი მიზანი კი სწორედ საფრანგეთსა და ევროპაში დომინირებაა. ვნახოთ, შევძლებთ თუ ვერა.
საქმე ის კი არ არის მე მინდა თუ არა მყავდეს ძლიერი მოწინააღმდეგე, არამედ ის, რომ საფრანგეთის ლიგა 1-ში ასეთი რეალობაა. ჩვენ 19 ქულით იმიტომ ვლიდერობთ, რომ ჩვენი გუნდი სხვებს ბევრად სჯობია, თუმცა მე ვხედავ სხვა ფრანგულ გუნდებს, რომლებიც ევროპულ შეჯიბრებებში საუკეთესოებს ტოლს არ უდებენ.
ჩვენ ნებისმიერი ქვეყნის ლიგაში უპრობლემოდ ვითამაშებდით: პრემიერლიგაში, ლა ლიგაში… რა გინდა რა მეტოქის წინააღმდეგ. მეტიც, იმ ლიგებში რომ ვიყოთ უფრო ძლიერები ვიქნებოდით, რადგან ჩვენი ერთ-ერთი საუკეთესო თვისება სტაბილურობაა. მოკლე შეჯიბრებებში ეს უფრო ძნელია’’.
„პარი სენ ჟერმენი’’ შემდეგ ტურში 29 მარტს სტუმრად ხვდება „სენტ ეტიენს’’.
