იტალიაში ეჭვი აღარავის ეპარება, რომ ზაფხულში ხვიჩა კვარაცხელია „ნაპოლიდან’’ წავა. ქართველ გარემარბს ახალი გამოწვევა და ღირსეული ხელფასი სურს. აპენინებზე წერენ, რომ კვარას ამბავს ყურადღებით აკვირდებიან ინგლისური კლუბები, რომელთა შორის ერთ-ერთი ყველაზე აქტიური გახლავთ „ლივერპული’’. მერსისაიდელებს ეგვიპტელი ვარსკვლავის მო სალაჰის შემცვლელი სჭირდებათ და კანდიდატებს არჩევენ.
„ლივერპულს’’ შეუძლია „აძურის’’ ფეხბურთელების გაცვლა შესთავაზოს. „ენფილდზე’’ თამაშობს იტალიელი ფედერიკო კიეზა, რომელმაც ინგლისურ გუნდში ფეხი ვერ მოიკიდა, „ნაპოლის’’ მწვრთნელს ანტონიო კონტეს კი ის ძალიან მოსწონს და დიდი ალბათობით კვარაცხელიას შემცვლელად მოიაზრებს.
ინგლისიდან გამოსული ხმების თანახმად „ლივერპული’’ იმედოვნებს, რომ იანვარში კიეზას ნეაპოლში იჯარით გაუშვებს, ზაფხულში კი კვარაცხელიას წაიყვანს და ზედ 50 მილიონ ევროს დაამატებს. ინგლისური კლუბის ვარაუდით ოპერციის ჯამური ფასი 70 მილიონი ევრო უნდა გამოვიდეს.
როგორც პორტალი areanapoli წერს, კვარაცხელიას აგენტს „ლივერპულის’’ წარმომადგენლები უკვე შეხვდნენ. საუბარი შედგა „ნაპოლის’’ დირექტორატთანაც, თუმცა პასუხი ჯერჯერობით უცნობია.
