„იუვენტუსის’’ ბრაზილიელი მცველი დანილო ტურინელთა მწვრთნელის ტიაგო მოტას გეგმებში აღარ შედის. როდესაც მისი თანამემამულე გლეისონ ბრემერი დაშავდა მას თითქოს შემადგენლობაში დაბრუნების შანსი მიეცა, მაგრამ ეს დროებითი აღმოჩნდა. დანილოს ტურინელებთან კონტრაქტი 2025 წლის ივლისამდე აქვს და კლუბისგან თავისუფალი აგენტის სტატუსს ითხოვს. მას ზაფხულამდე მოცდა არ უნდა, იანვარშივე სურს ახალ კლუბში გადასვლა. ცხადია, 33 წლის მცველი ბოლო ექვსი თვის გასამრჯელოზე უარს ამბობს.
დანილოს აყვანით კი „ნაპოლის’’ თავკაცი ანტონიო კონტეა დაინტერესებული. ვეტერანი მას არჩევანს გაუმდიდრებს. ის შეძლებს როგორც ოთხკაციან დაცვაში ასევე სხვა ტაქტიკურ ვარიანტებში მონაწილეობას. როგორც იტალიური პრესა წერს, ფეხბურთელმა „იუვეს’’ გათავისუფლება სწორედ „ნაპოლიში’’ გადასვლის გამო მოსთხოვა.
დანილო 2015-17 წლებში „რეალში’’ თამაშობდა, 2017-19 წლებში „მანჩესტერ სიტიში’’, ხოლო 2019 წლის შემდეგ „იუვენტუსშია’’. ბრაზილიის ნაკრებში მას 65 შეხვედრაში ერთი გოლი აქვს გატანილი.
