„ნაპოლის’’ პრეზიდენტმა აურელიო დე ლაურენტისმა თავისი კლუბის პარტნიორი რადიოს Radio Crc-ს ეთერიდან ნეაპოლელ გულშემატკივარს შობა მიულოცა.
„2024 წელი ორ ნაწილად იყო გაყოფილი: პირველი ექვსი თვე და მეორე ექვსი თვე. ჩვენ 14 წლის განმავლობაში ერთადერთი კლუბი ვიყავით, ვინც ყოველ წელიწადს გამოვდიოდით ევროთასებზე. მაგრამ, შემდეგ ჩავარდნა გვქონდა.
მე შეცდომები დავუშვი, რაზეც სრულ პასუხისმგებლობას ვიღებ. მე ვარ „დეუს ექს მაქინა’’ (მოულოდნელად გამოჩენილი ძალა, რომლის წყალობითაც გამოუვალი სიტუაციიდან გამოსავალი ჩნდება), ის ვისაც ფული მოაქვს და რაკი ასეა, პასუხისმგებლობაც ჩემზეა. პასუხისმგებლობა სხვებსაც რომ გავუნაწილო, ძალიან გრძელი სია გამოვა, ამიტომ ვამბობ, რომ ყველაფერი ჩემი ბრალია.
მე ვიპოვე კაცი, ანტონიო კონტე, რომელმაც დახმარების ხელი გამომიწოდა და მიხვდა, რომ რესტრუქტურიზაცია მჭირდებოდა. ჩვენ როგორც ძველი ასევე ახალი ფეხბურთელებისთვის ახალი ატმოსფერო უნდა შეგვექმნა და აგვეხსნა მათთვის, რომ ერთად ყველა მეტოქის დამარცხება შეგვიძლია’’, – თქვა დე ლაურენტისმა, რის შემდეგაც კონტესა და მის ოჯახს ბედნიერი შობა უსურვა.
შემდეგ პრეზიდენტმა შობა მიულოცა მწვრთნელის გარემოცვას, გაბრიელე ორეალის, სპორტულ დირექტორ ჯოვანი მანას, კაპიტან ჯოვანი დი ლორენცოს და ყველას ვინც „ნაპოლისთან’’ არის დაკავშირებული. ცხადია გულშემატკივარსაც.
„29 დეკემბერს ყველას „მარადონაზე’’ გელოდებით („ნაპოლი’’ „ვენეციას’’ ხვდება), თუმცა მე ამ დღეს ლოს ანჯელესში ვიქნები, სადაც ადრე ავდგები და დილის 6 საათზე 5X9 მეტრიან ტელევიზორში ვნახავ ჩვენი გუნდის თამაშს. ეს არის ნამდვილი კინოთეატრი, რომლის წინ შეიკრიბება ცოტა ხალხი, მხოლოდ ახლო მეგობრები და ჩემი ოჯახის წევრები. ხოლო როდესაც დავბრუნდები „მარადონაზე’’ პრეს-კონფერენციას მოვაწყობ’’, – თქვა დე ლაურენტისმა.
