„სანმა” მოიბოდიშა. ჩვენ ჯუდ ბელინგემს ძველი თაობის ინგლისელ ვარსკვლავებს, 2004 წლის უეინ რუნისა და 1990 წლის პოლ გასკოინს ვადარებდით, მაგრამ ის ყველაზე მეტიაო. ციტატა: „ჯუდ ბელინგემი აღემატება ყველას, ვისაც ბოლო 50 წელიწადში ნაკრების მაისურა სცმია, ხოლო მათ, ვისაც ბობი ჩარლტონი და სტენლი მეტიუზი ახსოვთ, შეუძლიათ ერთმანეთში ილაპარაკონ. ბელინგემი უფრო მუჰამედ ალის ან ტაიგერ ვუდსს ჰგავს. ის არის ფეხბურთელი, რომელიც გაცილებით სჯობია ყველას, ვინც მის კონკურენტად ითვლება და ამის შესახებ თავადაც ძალიან კარგად იცის”.
ცნობილი ტაბლოიდი წერს, ბელინგემი ასეთი ყინჩი და ამპარტავანი რომ არ იყოს, გადამწყვეტი სიტყვის მთქმელი ვერ იქნებოდაო. ინგლისის ნაკრებს ევროპის ჩემპიონატის პირველ შეხვედრაში გამარჯვება მისმა თავურმა მოუტანა. ზუსტად ასე იყო ყატარშიც, როდესაც მსოფლიოს ჩემპიონატზე მისმა გოლმა პირველ შეხვედრაში ირანის განადგურებას დაუდო საფუძველი. ჯუდმა სერბებს კლასიკური ცენტრფორვარდის სტილში გაუტანა, მაგრამ ის ცენტრფორვარდი არ არის. მას შეუძლია იყოს ათი ნომერი, შეუძლია ითამაშოს მარცხნივ ან მარჯვნივ. ბელინგემი გაცილებით საზრიანია ვიდრე მისტერ ბინი. ის ჯერ 21 წლისაც არ არის (29 ივნისს ხდება), მაგრამ გარეთ საუთგეიტის გუნდის ლიდერია. ის არის საუკეთესო პასების მიმწოდებელი, საუკეთესო ბურთის მომპოვებელი და მას მერე, რაც „რეალში” გადავიდა, საუკეთესო შემოქმედიც გახდა. მეტიც, ის ჰარი კეინსაც კი უწევს კონკურენციას როგორც ინგლისის ნაკრების საუკეთესო მეგოლე.
იყო კამათი, ბელინგემი ათი ნომრის პოზიციიდან ფილ ფოდენის ადგილზე ხომ არ გადავიყვანოთო. ფოდენი პრემიერლიგის საუკეთესო მოთამაშეა, ოღონდ ნაკრებში იშვიათად ბრწყინავს. მაგრამ, როდესაც არსებობს ბელინგემი, გუნდი მის გარშემო უნდა ააწყო. დანარჩენები რიგში ჩადგებიან.
„სანის” აზრით ინგლისის და სერბეთის შეხვედრაში კეინი მეტწილად მაყურებლის როლში იყო, ფოდენმა კი ისევ ვერ მოახდინა შთაბეჭდილება, მაგრამ სამი ლომის გუნდმა საუთგეიტის ხელმძღვანელობით უკვე მეოთხედ მოიგო მსხვილი შეჯიბრების პირველი შეხვედრა.
„გელზენკირხენი, სადაც ინგლისის და სერბეთის შეხვედრა გაიმართა ის ქალაქია, რომელშიც 2006 წლის მსოფლიოს ჩემპიონატზე უეინ რუნი ფეხებს აბაკუნებდა, რონალდუ თვალს აპაჭუნებდა, ინგლისმა მორიგი პენალტების სერია წააგო, ფეხბურთელების ცოლებისა და მეგობარი გოგონების ცირკმა კი ქალაქი დატოვა. მაგრამ, დაივიწყეთ ძველი დრო და „ოქროს თაობა”. საუთგეიტის ინგლისი სერიოზული გუნდია”, — წერს „სანი”.
