საოცარი გაგრა

„კრისტალბეთ ეროვნული ლიგის“ მე-17 ტურში  გორის „დილამ“ ლიდერობა კიდევ უფრო გაიმყარა და ახლა უშუალო მდევარ „ტორპედოს“ 6 ქულით უსწრებს.

გორელებმა მნიშვნელოვანი გამარჯვება მოიპოვეს ერთ-ერთ მთავარ კონკურენტ „ბათუმთან“ (2:0), თანაც სტუმრად. დუბლი მიითვალა „დილას“ ნიდერლანდელმა ტაირელ ვაუტერმა. ეს ტაირელის მეორე ორგოლაა მიმდინარე სეზონში.

ამგვარად, „დილა“ არ დამარხებულა ზედიზედ 14 მატჩში. ბათუმელებს კი ერთგვარი კრიზისი აქვთ. ანდრი დემჩენკოს გუნდმა ბოლო 5 შეხვედრიდან მხოლოდ ერთი მოიგო.

„ტორპედომ“ იმერულ დერბიში სტუმრად „სამგურალი“ 3:1 დაამარცხა და მეორე ადგილზე აინაცვლა. ეს ქუთაისელთა მიჯრით მეოთხე გამარჯვება გახლდათ. სტივ კინის შეგირდები 12 ტურია აღარ დამარცხებულან.

„კოლხეთი“ „დინამოს“ 90+2 წუთამდე უგებდა, მაგრამ გიორგი მოისწრაფიშვილის გოლით „დინამომ“ მაინც შეძლო გათანაბრება. შეგახსენებთ, რომ „დინამოს“ აღარ გაუმარჯვია ბოლო 4 შეხვედრაში.

„თელავმა“ და „სამტრედიამ“ ერთმანეთს ვერ გაუტანეს.

ტურის მთავარი ამბავი კი „დავით პეტრიაშვილზე“ მოხდა, სადაც „გაგრამ“ „იბერიას“ 4:0 მოუგო… დუბლი მიითვალა ექს-გარეჯელმა გიორგი ხარებაშვილმა.

ბიჭებმა საოცრად ითამაშესო, – თქვა შემდეგ გაგრელთა დამრიგებელმა, გიორგი ონიანმა.

„იბერიამ“ კი ბოლო 5 მატჩიდან 4  წააგო, თანაც ორი დიდი ანგარიშით.

 კოლხეთი 2:2 დინამო

0:1 სანტისი (3), 1;1 ხარებავა (20), 2:1 გიორგი მელქაძე (65), 2:2 მოისწრაფიშვილი (90+2)

ბათუმი 0:2 დილა

0:1, 0:2 ვაუტერი (71, 78)

სამგურალი 1:3  ტორპედო

0:1 გიგაური (54), 0:2 იონსენი (61), 1:2 ფანცულაია (77 პენ), 1:3 ნინკოვიჩი (83)

გაგრა 4:0 იბერია

1:0 ხარებაშვილი (5), 2:0 ჯანგიძე (14), 3:0 ვაწაძე (21), 4:0 ხარებაშვილი (45+3)

თელავი 0:0 სამტრედია

მეგოლეები: ბიორნ იონსენი (ტორპედო, ნორვეგია) – 10, ტაირელ ვაუტერი (დილა, ნიდერლანდები) – 9, გიორგი კოხრეიძე, შოთა ნონიკაშვილი (ორივე – იბერია) – 7