უდინეში ფრედ, 1:1 ნათამაშევი მატჩის შემდეგ „ნაპოლის” მწვრთნელმა ფრანჩესკო კალცონამ პრეს-კონფერენციაზე თქვა:
…ყოველთვის, როდესაც თამაში ბინძურ სახეს იღებს, ჩვენ გვიჭირს. ვიცოდი რა მეტოქის ფიზიკური მომზადება, ჩემს ფეხბურთელებს ბურთის საკუთარი კარიდან რაც შეიძლება შორს კონტროლი ვთხოვე, რასაც ხან ვახერხებდით და ხან ვერა. აუცილებლად უნდა გაგვეტანა მეორე გოლიც, რადგან როგორც წესი თავადაც ვუშვებთ და ჩავარდნისგან რამენაირად თავი უნდა დაგვეზღვია. დღეს ერთი ერთზე თამაშში გვაკლდა უპირატესობა. პოლიტანოს კაცზე წასვლა შეუძლია, ლინდსტრომს კი მეტი მუშაობა სჭირდება. რაც მე ამ გუნდს ვხელმძღვანელობ, ეს მესამე შემთხვევაა როდესაც უპირატესობა მოვიპოვეთ, მაგრამ ვერ შევინარჩუნეთ. „უდინეზეს” კი ცხრილში ასე დაბლა ვერ წარმოვიდგენდი. მათდა სამწუხაროდ, სეზონი ასე წარომართა, მაგრამ ჯერ კიდევ შეუძლიათ მდგომარეობის გამოსწორება…
…პირველ ტაიმში, მეტოქემ ხუთკაციანი დაცვა დაგვახვედრა, ჩვენკი ის უნდა აგვერია, მაგრამ ვერ შევძელით. შესვენების მერე რაღაც შესაძლებლობები შევქმენით, თუმცა ზედიზედ მეოთხე თამაში ვერ მოვიგეთ…
…ჩვენ გვიდგას პრობლემებით სავსე წელიწადი. საქმე იმანაც გაგვირთულა, რომ გავიარეთ თვე, როდესაც კვირაში სამი თამაში გვიწევდა. ყველაფრის თავიდან დაწყება მოგვიხდა. ბევრი რამ გავაუმჯობესეთ, მაგრამ ბევრი რამ გაუარესდა კიდეც. ნებისმიერ ფასად შედეგზე ფიქრი ნამდვილად არ გვიწყობს ხელს. მომავალ სეზონზეც უნდა ვიფიქროთ. ის, რომ „ნაპოლის” დონის კლუბში დირექტორებზე და მწვრთნელებზე ლაპარაკობენ, ბუნებრივია, თუმცა მეორე მხრივ ეს იმას ნიშნავს, რომ მენტალურად თავისუფალი არ ხარ. თავს არ ვიმართლებ, მაგრამ რომ ჩამოვედი საშინელი მდგომარეობა დამხვდა. მისი გამოსწორებისთვის ცოტა მეტი დრო და ნაკლები თამაში იქნება უმჯობესი. ახლა ჩემპიონატი მაღალ ნოტაზე უნდა დავასრულოთ, რათა გულშემატკივარი გავახალისოთ…
…მე რომ ამ გუნდს სეზონის დასაწყისიდანვე ჩავდგომოდი სათავეში რასაკვირველია უკეთესი იქნებოდა, რადგან მოსამზადებლად 40 დღე გვექნებოდა. ჩემს ჩამოსვლას სათასო თამაშები და სანაკრებო პაუზებიც დაემთხვა. ამან, რასაკვირველია, მდგომარეობა გაგვირთულა. არ ვიცი რამდენად ხარისხიანად იმუშავეს ჩემმა წინამორბედებმა. ამის შესახებ თავად მათ და ფეხბურთელებმა უნდა თქვან. ერთი რამ შემიძლია ვთქვა, რომ ბოლო მატჩამდე უნდა ვიბრძოლოთ. წინასწარ შვებულებაში გასვლას არ ვაპირებ. ახლა „ბოლონიასთან” თამაშზე ვიწყებ ფიქრს…
…სამომავლოდ ჩემთვის არავის არაფერი შემოუთავაზებია. თუ „ნაპოლის” ახალი მწვრთნელი ეყოლება, ის ალბათ ახალ ასისტენტებს მოიყვანს…
