„ნაპოლიმ” ფრანჩესკო კალცონას მიყვანა ხომ არ დაიგვიანაო, შიშობს პორტალი tuttonapoli და დასძენს, რომ ეს შეკითხვა ლოგიკურია, რადგან ერთი მხრივ გუნდს ჩავარდნა აქვს, მეორე მხრივ კი ახალი მწვრთნელი სტატისტიკას აუმჯობებსებს. მიმდინარე სეზონში „ნაპოლის” მესამე თავკაცი, რომელიც „აძურის” სათავეში 19 თებერვალს ჩაუდგა, იმთავითვე ურთულესი ამოცანის წინაშე იყო: ორიენტაციადაკარგული გუნდი გამარჯვების გზებზე უნდა დაებრუნებინა, მისთვის სახე აღედგინა.
გარსიას შემდეგ მაცარის მოსვლამ „ნაპოლი” შავ დღეში ჩააგდო — გუნდი მეოთხე ადგილიდან მეცხრემდე დაქვეითდა. ფრანგმა 12 ტურში 21 ქულა მოიპოვა, ტოსკანელმა კი იმდენივე შეხვედრაში მხოლოდ 15. შემცირდა გატანილი გოლების რაოდენობაც. გარსიას ხელში „პარტენოპეელებს” ერთ მატჩში საშუალოდ 2 გოლი გაჰქონდათ, მაცარის ხელში კი ეს მონაცემი 0.7-მდე შემცირდა. ერთ მატჩში 0.7 გოლი იტალიაში ბოლოსწინა შედეგი გამოდგა. მარტივად რომ ვთქვათ, მაცარის დროს „ნაპოლიმ” მხოლოდ 9 გოლი შეაგდო.
კალცონამ კი მოსვლისთანავე შეტევაზე გაამახვილა ყურადღება, აღადგინა ეგრეთწოდებული მაღალი პრესინგი და კონტრ-პრესინგი, „აძურის” თამაშში დააბრუნა ის თვისებები, რომლებიც ასე უყვარს მაურიციო სარის და რომლებსაც წარმატებით იყენებდა ლუჩანო სპალეტი. და მიუხედავად იმისა, რომ რამდენიმე შეხვედრა სასურველი შედეგით არ დასრულდა, პროგრესი მაინც თვალსაჩინო გამოვიდა.
ის, რომ კალცონას ხელში „აძური” უკეთ თამაშობს, ვიდრე მაცარის ხელში თამაშობდა, tuttonapoli-ს მიერ მოყვანილი სტატისტიკიდანაც კარგად ჩანს. ასე მაგალითად საშუალოდ ერთ შეხვედრაში მოპოვებული ქულების რაოდენობა 1.2-დან 1.7-მდე გაიზარდა და გარსიას დროინდელ შედეგს გაუტოლდა.
თუკი მაცარის დროს შეხვედრების 60% გატანილი გოლის გარეშე სრულდებოდა, კალცონამ მნიშვნელოვან პროგრესს მიაღწია — 15%. ერთ შეხვედრაში გატანილი გოლების საშუალო მაჩვენებელი 0.7-დან 2.15-მდე გაიზარდა. გაუმჯობესდა „ნაპოლის” მიერ მეტოქის კართან და მეტოქის მიერ „ნაპოლის” კართან შექმნილი სახიფათო მომენტების მაჩვენებლებიც. კერძოდ, მოწინააღმდეგის კართან შექმნილი სახიფათო მომენტების კოეფიციენტი გარსიას დროინდელ 1.90-ს დაუბრუნდა, საკუთარ კართან მიღებული სახიფათო მომენტების რაოდენობა კი 1.05-მდე შემცირდა — სხვათა შორის, ეს შედეგი გარსიასაც უარესი ჰქონდა (1.30) და მაცარისაც (1.20).
და ერთადერთი, რაშიც კალცონას წინამორბედები სჯობდნენ გაშვებული გოლების საშუალო რიცხვია: გარსია — 1.10; მაცარი — 1.20; კალცონა კი — 1.40.
