საიტი spazionapoli წერს, რომ მიმდინარე სეზონში „ნაპოლის” ცხოვრებაში გასაგები და მისაღები ცოტა რამ მოხდა. ბევრ სხვა ამბავთან ერთად პარადოქსული იყო ელიფ ელმასის გაყიდვაც, რამაც სიკეთე არც გუნდს მოუტანა და არც ფეხბურთელს. მეტიც, ჩრდილო მაკედონიელ ვარსკვლავს ეტყობა ნოსტალგია შემოაწვა და როგორც კი შესაძლებლობა მიეცა, „ლაიფციგის” სათადარიგოთა სკამზე ჯდომისგან მოზღვავებული დარდის გასაქარვებლად ნეაპოლს ეწვია, სადაც ქუჩებში მანქანით ისერინა, მაგნიტოფონში ადგილობრივი ლეგენდის პინო დანიელეს სიმღერები ჩართო, ქალაქის ცენტრში ფოტოები გადაიღო (აქ დართული ფოტო მისი ინსტაგრამიდანაა) და მაღაზიები მოიარა.
არადა, დღეს როდესაც „აძურის” გაუჭირდა, პიოტრ ჟელინსკი ფიქრებით უკვე „ინტერშია”, ხოლო ჰამედ ტრაორე კარგი შენაძენია თუ ცუდი ჯერ ვერავინ გაარკვია, ელმასის მოედანზე ყოფნა გუნდისთვის მისწრება იქნებოდა.
ჩრდილო მაკედონიელის კარიერა ცუდად გაგრძელდა. აქაოდა „ნაპოლიში” სათამაშო დრო აკლიაო, „ლაიფციგში” გაყიდეს, სადაც უარეს დღეში ჩავარდა. იანვრიდან მოყოლებული დღემდე, ელმასმა მოედანზე ჯამში 129 წუთი დაჰყო, რაც ტაიმნახევარიც კი არ არის. ის ზღაპარი, რომ „ლაიფციგთან” ერთად ჩემპიონთა ლიგაში „პარტენოპეიზე” უკეთეს შედეგს მიაღწევდა, მერვედფინალში „რეალმა” დაამთავრა.
ამბობენ, რომ გერმანულ გუნდში ელმასს სათამაშო დრო თანდათან მოემატება. მომდევნო სეზონში ის შესაძლოა უფრო ხშირად ვიხილოთ მოედანზე. ეს თუ მოხდება, „ლაიფციგიდან” ნიდერლანდელი ხავი სიმონსის წასვლით იქნება განპირობებული, მაგრამ spazionapoli მაინც სვამს მწარე კითხვას: რატომ უნდა ჩაეგდო „ნაპოლის” ასეთ დღეში თავი ან ფეხბურთელი?
დღეს შექმნილ ვითარებაში ელმასი იტალიის ჩემპიონისთვის ხომ ფასდაუდებელი იქნებოდა. სავარაუდოდ, ძირითადი შემადგენლობაც გარანტირებული ექნებოდა და კიდევ, თუ კლუბი მის გაყიდვას აპირებდა, რატომ არ მოძებნა შესაბამისი შემცვლელი?
„დღეს მძაფრად დგას ლეგიტიმური კითხვა: რატომ? რაც მოხდა სამწუხაროა და მას ახსნა არ აქვს”, — წერს პორტალი.
