ფიფამ გადაწყვიტა ნათელი მოჰფინოს 2025 წლისთვის დანიშნულ, ახალი ფორმატის კლუბთა მსოფლიოს ჩემპიონატთან დაკავშირებულ საკითხებს და თავის ოფიციალურ X პლატფორმაზე (ეს სოციალური ქსელი ადრე „ტვიტერის” სახელით იყო ცნობილი) ჩამოთვალა გუნდები, რომელთა შეჯიბრებაში მონაწილეობა ჯერ გადაწყვეტილი არ არის. კარგა ხანია დადგენილია, რომ იტალია წარდგენილი იქნება ორი კლუბით. ამ ორიდან ერთი იქნება „ინტერი”, მეორე კი „იუვენტუსს”, „ნაპოლისა” და „ლაციოს” შორის უნდა აერჩიათ, მაგრამ წუხელ „ბაიერნმა” რომაელებს 3:0 მოუგო, ჩემპიონთა ლიგიდან გამოთიშა (პირველი შეხვედრა 0:1) და ტურინელებს კონკურენტად ხვიჩა კვარაცხელიას „აძურიღა” დარჩათ. მანამდე კი ფიფამ მკაფიოდ დაწერა:
„თუ „ნაპოლი” და „ლაციო” ევროთასების შემდეგ ეტაპზე ვერ გავლენ, ფიფას კლუბთა მსოფლიოს ჩემპიონატში მონაწილეობას „იუვენტუსი” მიიღებს”.
შეგახსენებთ, რომ „ნაპოლი” „ბარსელონას” ხვდება. მერვედფინალის პირველი შეხვედრა ნეაპოლში 1:1 დასრულდა, საპასუხო კი 12 მარტს ბარსელონაში გაიმართება.
რამდენიმე დღის წინ „ნაპოლის” პრეზიდენტმა აურელიო დე ლაურენტისმა „იუვენტუსის” წინააღმდეგ გაილაშქრა და თქვა, რომ რაც გინდა მოხდეს, 2025 წლის კლუბთა მუნდიალში თამაშს „ნაპოლი” იმსახურებს. როგორც გაირკვა, ფიფა დე ლაურენტისს მოსაზრებებს კატეგორიულად არ იზიარებს.
