1-3 მარტს ეროვნული ლიგის პირველი ტურის მატჩები გაიმართა. ხუთივე შეხვედრა მასპინძლებმა მოიგეს. შესრულდა ერთი დუბლი. ოთხი ფეხბურთელი გააძევეს და ერთიც ავტოგოლი დაფიქსირდა.
ყველაზე დიდი ანგარიშით ქუთაისის „ტორპედომ“ იმარჯვა. სტივ კინის შეგირდებმა „სამტრედიას“ 4:1 მოუგეს და პირველ ადგილზე დადგნენ. დუბლი შეასრულა ქუთაისელთა ნორვეგიელმა ახალწვეულმა ბიორნ იონსენმა. ერთი ბურთი თერთმეტმეტრიანით გიორგი არაბიძემ გაიტანა. დაფიქსირდა სეზონის პირველი ავტოგოლიც, საკუთარ კარში გოლი სამტრედიელთა არგენტინელმა, ერიკ ბარიოსმა შეაგდო.
87-ე წუთზე სტუმრები კაცნაკლულნი დარჩნენ, მსაჯმა გიორგი ყრუაშვილმა ჯემალ ჩიჩუას მეორე ყვითელი ბარათი უჩვენა და მინდვრიდან დაითხოვა.
სეზონის პირველი გოლი კი სენეგალელმა ონორე გომისმა გაიტანა. გახსნის მატჩში ჩემპიონმა „ბათუმმა“ დებიუტანტ ფოთის „კოლხეთს“ უმასპინძლა და 1:0 დაამარცხა ერთადერთი გოლი მე-11 წუთზე სწორედ გომისმა შეაგდო.
„საბურთალომ,“ რომელსაც ამიერიდან „იბერია 1999“ ჰქვია, ახალი სახელით „თელავს“ მოუგო. ერთადერთი ბურთი პირველი ტაიმის მიწურულს შოთა ნონიკაშვილმა გაიტანა.
სტუმრები ამ შეხვედრაშიც კაცნაკლულნი დარჩნენ, მსაჯმა ბაკურ ნინუამ 45+5 წუთზე დავით გოგოტიშვილი გააძევა.
„დინამომ“ „სამგურალს“ ფრანგი დებიუტანტის, დომინიკ საიმონისა და „დინამო 2“-დან დაწინაურებული 20 წლის ნიკა სიხარულაშვილის გოლებით 2:0 მოუგო. აქ მსაჯმა, ირალი კვირიკაშვილმა ორი ფეხბურთელი გააძევა, 82-ე წუთზე სტუმარმა ლუკა ხორხელმა მეორე ყვითელი ბარათი მიიღო და მინდორი დატოვა. 89-ზე კი მასპინძელ გიორგი მაისურაძეს მისცა მეორე გაფრთხილება და მოედანი დაატოვებინა.
ტურის დასკვნით მატჩში გორელი დებიუტანტი ლეგიონერები გამოირჩნენ. თავი ნიდერლანდელებმა გამოიჩინეს. ანგარიში უკვე მე-2 წუთზე ტაირელ ვაუტერმა გახსნა, 39-ზე კი კიფონ ლაიდსმანმა მეორე შეაგდო. თამაშიც ასე დასრულდა – 2:0.
მოკლედ, ეროვნული ჩემპიონატის 36-ე სეზონი დაიწყო.
