„ნაპოლიდან” „ეინდჰოვენში” გადასული მექსიკელი გარემარბი ირვინგ ლოსანო ჰოლანდიური გუნდის ბოლო ჩემპიონთალიგურ შეხვედრაში კრიტიკის ობიექტი გახდა. „დორტმუნდთან” (1:1) მან ვერც დამაგვირგვინებელ ფაზაში ივარგა და ვერც შეტევის გამწვავებით გამოიჩინა თავი. გასულ სეზონში იტალიური სკუდეტოს მფლობელმა მოგვიანებით „სქაი სპორტს” უთხრა:
„ჩემი ახლანდელი გუნდი რაღაცით შარშანდელ „ნაპოლის” მაგონებს. აქ ჭარბადაა ოსტატობა, გუნდური სული და შრომისმოყვარეობა. „ეინდჰოვენს” მწვრთნელიც ჩინებული ჰყავს, ამიტომ როგორც შარშან „ნაპოლი” გახდა ჩემპიონი, წლეულს ისევე შეგვიძლია ჩვენც მივაღწიოს წარმატებას”.
შემდეგ ლოსანოს „აძურის” შესახებ ჰკითხეს.
„მე ვიცნობ ფრანჩესკო კალცონას. იმედი მაქვს, რომ მისი ხელმძღვანელობით „ნაპოლის” სულ მალე ვიხილავ იქ, სადაც იმსახურებს ყოფნას — ცხრილის სათავეში”.
კითხვაზე, ეხმიანება თუ არა ყოფილ თანაგუნდელებს, „ჩაკიმ” უპასუხა:
„დიახ, მე რამდენიმე მათგანთან ვინარჩუნებ ურთიერთობას. ჩემს მეგობრებს მთელი გულით ვგულშემატკივრობ. ბევრი მათგანი კვლავ „ნაპოლიში” თამაშობს.
გასული სეზონი ? ნეაპოლში დიდი გამოცდილება შევიძინე და როგორც ფეხბურთელი ძალიან გავიზარდე. ხალხი ძალიან მეგობრული იყო, გულშემატკივარს ძალიან ვუყვარდი. მიხარია, რომ ამ კლუბის ისტორიაში დავრჩები. ჩვენ სკუდეტო 33 წლის შემდეგ მოვიგეთ. ეს იყო უნიკალური, ჯადოსნური რაღაც. ეს გამარჯვება პირადად ჩემთვისაც ძალიან მნიშვნელოვანი გახლდათ. შემდეგ კი იმედებით აღსავსე „ეინდჰოვენში” ჩამოვედი. მინდა აქაც დიდ წარმატებას მივაღწიო და მზად ვარ ამისათვის მთელი ძალა და ღონე დავხარჯო. ნეაპოლის შემდეგ ვგრძნობ, რომ ძალიან დაღვინებული ვარ. კიდევ ჩემთვის მნიშვნელოვანია გულშემატკივარს მხარდაჭერისთვის მადლობა საქმით გადავუხადო”.
