საქართველოს კალათბურთელთა ნაკრები ევროპის ჩემპიონატის შესარჩევი ეტაპისთვის მზადებას ჯერ კიდევ თბილისში აგრძელებს. შეგახსენებთ, ახალი მწვრთნელის, ალექსანდრ ჯიკიჩის ხელმძღვანელობით ჩვენი გუნდი პირველ მატჩს 23 თებერვალს დანიაში გამართავს, თუმც გუნდი ჯერ კიდევ არასრული შემადგენლობით ვარჯიშობს. ნაკრებს ესპანეთიდან პირდაპირ დანიაში შეუერთდებიან გიორგი შერმადინი და ბექა ბურჯანაძე, ხოლო საფრანგეთიდან მწვრთნელის ასისტენტი მანუჩარ მარკოიშვილი.
უკვე ჯიკიჩის ხელმძღვანელობით ვარჯიშობენ კაპიტანი თორნიკე შენგელია და ამერიკელი ლეგიონერი ჯო ტომასონი. გეტყვით, რომ ტომასონის თბილისში ჩამოსვლა ნაკრების ვარჯიშების დაწყების პირველივე დღეს იგეგმებოდა, მაგრამ მას შემდეგ, რაც ქართული პასპორტი აიღო, ჯო ევროლიგის კლუბ თელ ავივის „მაკაბიში“ გადავიდა და გეგმები შეიცვალა.
რაც შეეხება შენგელიას, მისი გუნდი იტალიის თასის გათამაშებაში მონაწილეობდა და სავარაუდოდ პირველი ბარიერი უნდა დაეძლია. თუმცა, ბოლონიური გუნდი მოულოდნელად „რეჯიო ემილიასთან“ დამარცხდა და კაპიტანიც საქართველოსკენ დაიძრა.
იმ 12 კალათბურთელს, რომელებიც დანიასთან მატჩის განაცხადში იქნება, ჯიკიჩი თამაშის წინა დღეს იტყვის.
დანიაში გამგზავრებამდე საქართველოს ნაკრების გაფართოებული შემადგენლობა კი ასეთია: მცველები: გიორგი ცინცაძე (თსუ), რატი ანდრონიკაშვილი (სარაგოსა, ესპანეთი), ოთარ ფხაკაძე (დელტა), რევაზ როგავა (ბათუმი), გიორგი ოჩხიკიძე (ქუთაისი), ჯო ტომასონი (მაქაბი, ისრაელი), დავით კაკუშაძე (ვსა), დუდა სანაძე (პაკსი, უნგრეთი), ნიკოლოზ გაფრინდაშვილი, ლევან გოგიჩაიშვილი (ორივე კავკასია); ფორვარდები: კახაბერ ჯინჭარაძე, ალექსანდრე ფევაძე (ორივე თსუ), ოთარ ბულიავა (ბათუმი), თორნიკე შენგელია (ვირტუსი, იტალია), ბექა ბურჯანაძე (კორუნა, ესპანეთი), ნიკა დარბაიძე (დელტა), გუგა პატაშური (რუსთავი); ცენტრები: გიორგი შერმადინი (ტენერიფე, ესპანეთი), გიორგი ტურძილაძე, ბექა ბექაური (ორივე დელტა), ილია ლონდარიძე (კავკასია), გიორგი ბაქრაძე (ივერიონი).
ნაკრებში გამოძახებულ 22 კალათბურთელთან ერთად თბილისში იმყოფებიან მათე ხატიაშვილი (15 წლის), ავთო ბახტაძე (16), ლუკა ალავიძე (19) და გუგა ნაცვლიშვილი (19).
