ძიუდოს საერთაშორისო ფედერაციამ (IJF) წლის საუკეთესო ვაჟ ძიუდოისტად ტატო გრიგალაშვილი დაასახელა.
81 კილოგრამამდე წონით კატეგორიაში მოჭიდავე ქართველმა ეს ჯილდო ზედიზედ მეორედ მოიგო. ნომინანტი კი ხუთი იყო: ტატოს გარდა კიდევ ერთი ჩვენებური ლუკა მაისურაძე, იაპონელი ჰიფუმი აბე, ესპანელი ფრანსისკო გარიგოსი და შვეიცარიელი ნილს შტუმპი.
შეგახსენებთ, რომ 2023 წელს გრიგალაშვილმა მსოფლიოს ჩემპიონატი მოიგო, ხოლო ევროპის ჩემპიონატზე ვერცხლს დასჯერდა. გრიგალაშვილი გახდა პირველი ძიუდოისტი (საქართველოს სახელით) ვინც ორჯერ მოახერხა მსოფლიოს ჩემპიონატებზე გამარჯვება.
ქალთა შორის ასევე ზედიზედ მეორედ წლის საუკეთესო იაპონელი უტა აბე გახდა, რომელსაც IJF-ის ეგიდით გამართულ შეჯიბრებებზე 2019 წლის შემდეგ არ წაუგია. ამომავალი ვარსკვლავის პრიზი კი, ასევე იაპონელს, 19 წლის დოტა არაის გადაეცა.
