„ნაპოლიმ” „ვერონა” დაამარცხა – 2:1. ეს იყო ნეაპოლელთა რთული გამარჯვება, რომელსაც ბოლოში ერთი კაცის ხელმოწერა ამშვენებდა: ხვიჩა კვარაცხელია. ქართველი ფეხბურთელის მიერ შექმნილმა ავთენტურმა მარგალიტმა გუნდს ჩემპიონთა ლიგაში გასვლისთვის ძალიან მნიშვნელოვანი სამი ქულა მოუტანა.
მართალია ჯერ კიდევ გაჭირვებით, მაგრამ როდესაც „ნაპოლი” შემტევ ფეხბურთს თამაშობს, ჩვეულებრივ კვარაცხელია ანათებს: მარადონას სახელობის სტადიონის თავზე ღრუბელს მისი დრიბლინგი, მოპოვებული და უსამართლოდ არ-დანიშნული პენალტები, საგოლე პასები და ცისარტყელა ფანტავს. დასამალი არაფერია: კვარაცხელია „ნაპოლის” ვარსკვლავია, რომელიც რთულ მომენტებში ბურთს ეუფლება და ცდილობს აანთოს ნაპერწკალი, რომელიც მის თანაგუნდელებსაც აიყოლიებს. „ვერონას” კარში გატანილი ევროგოლი იმის ნათელი მაგალითია, რომ 77-ე ნომერი თავად წარმოადგენს განსხვავებას კარგსა და ცუდს შორის.
ზაფხულში, როდესაც ოსიმენი „ნაპოლიდან” წავა, კვარაცხელია უნდა გახდეს ქვაკუთხედი, რომელზეც მომდევნო სეზონის გუნდი აშენდება, მაგრამ არის ერთი სამწუხარო პრობლემა: გასული სკუდეტოს MVP და ჩემპიონთა ლიგის საუკეთესო ახალგაზრდა ფეხბურთელი (ეს დაიმახსოვრეთ) წელიწადში მხოლოდ 1,5 მილიონ ევროს იღებს და იტალიის ჩემპიონი გუნდის ფეხბურთელებს შორის ყველაზე დაბალანაზღაურებადთა შორისაა. მასზე ცოტას უხდიან მხოლოდ კაიუსტეს, ნგონგეს, ნატანს, ჟუან ჟესუსს, ოსტიგორს, მაცოკის და გოლინის. აშკარაა, რომ გასამრჯელო, რომელსაც ქართველს უხდიან არ შეესაბამება მის ფუნდამენტურ როლს „აძურიში”. ამიტომ, მოდი მისით დავიწყოთ და ეს ფეხბურთელი ყველა გაგებით ლიდერად ვაქციოთ. ბოლოს და ბოლოს ხალხს მრავალმილიონიან კონტრაქტებს მხოლოდ გაზრდილი კაპიტალის დაკარგვის შიშით როდი უფორმებენ (დიახ, ოსიმენზე მივანიშნებთ), არამედ უპირველეს ყოვლისა მადლიერების ნიშნად: ეს 22 წლის ბიჭი ყველაფერს აკეთებს რათა „ნაპოლი” ამ წყეული სეზონის მიერ წარმოშობილი პრობლემებიდან გამოიყვანოს.
ყველაზე დიდი მადლობა მისთვის (და შვება იმ ხალხისთვის, რომელიც შიშობს, რომ ზაფხულში ის შეიძლება „ნაპოლიდან” წავიდეს) ახალი „დალოცვილი” ხელშეკრულების გაფორმება იქნება ყოველგვარი ჩამოფარებული ფარდის, ხანგრძლივი ლაყბობის და მკლავჭიდის გარეშე. საჭიროა უბრალო კონტრაქტი (ცხადია კლუბის შესაძლებლობების გათვალისწინებით), რათა პატივი ვცეთ ხალხს, რომელიც ამ „ნაპოლის” ჩაძირვის საშუალებას არ აძლევს.
რიკარდო კატაპანო, calcionapoli24
