საფრანგეთსა და ინგლისში ზედ ახალი წლის დადგომამდე სარაგბო ჩემპიონატების მორიგი ტური გაიმართა. რას იზამ, კალენდარი სულ უფრო და უფრო ვიწროვდება სანაკრებო და საევროთასო ფანჯრების გამო, ჰოდა ევროპის მოწინავე სარაგბო ქვეყნებს პაუზების გარეშე უწევთ არსებობა.
ჰოდა, ამ საზეიმო განწყობამ ჩვენი ბიჭების გაბრწყინება მოიტანა – ტოპ 14-ის ტურში ერთბაშად სამი ქართული ლელო გავიდა, თან ერთი მეორეზე ლამაზი.
ბექა გორგაძეს გასული წელი ფაქტობრივად ჩაუვარდა – მძიმე ტრავმას წვრილები მოჰყვა და ბორჯღალოსანთა ერთ-ერთი გამორჩეული ლიდერი ფორმაში ახლაღა შედის. მისი „პო“ ოიონაქსში კი დამარცხდა, მაგრამ ქართველმა მესამეხაზელმა ბრწყინვალედ ითამაშა – შეხვედრა შეუცვლელად ჩაატარა და მე-40 წუთზე თავისი შერკინებიდან ბურთი ისე გამოტანა და ისე დაამიწა ლელოში, მეტოქეებმა თვალის დახამხამებაც ვერ მოასწრეს. ასეთების გაკეთება „ბექსონას“ მაგრად რომ ეხერხება, ყველამ კარგად იცის. ეს იყო ბექას პირველი ლელო მიმდინარე ჩემპიონატის ოდენ მესამე მატჩში, სულ კი მან ტოპ 14-ში უკვე 62 მატჩი გამართა, ოიონაქსური ლელო კი მისთვის მე-9 იყო. „პომ“ კი წააგო – 13:34, მაგრამ 31 ქულით ცხრილში მე-4, საპლეიოფო ადგილზე მაინც იმყოფება.
„ლიონმა“ წარუმატებელი სერია მძიმე გამარჯვებით დაასრულა – „მონპელიეს“ 20:18 მოუგო და ბონუსიც გაატანა. მატჩის მონაწილე ორივე ახალგაზრდა ქართველმა თავი გამოიჩინა.
ჯერ იყო და, ბოლო მცველად მოთამაშე დავით ნინიაშვილმა 23-ე წუთზე ხანგრძლივი ხელდახელ გათამაშება ცენტრიდან ხაზის გარღვევითა და ლელოში უმეურვეოდ შერბენით დაასრულა და ეს იყო მისთვის მე-4 ლელო სეზონში გამართულ მე-8 თამაშში (ტოპ 14-ში მისი მონაგარი კი 31 მატჩში 13 ლელოს შეადგენს), ფაქტობრივად საპასუხო შეევაში კი, 27-ეზე, მონპელიელმა კვაჭმა ვანო კარკაძემ ლელოს ხაზზე შექმნილი რაქიდან ბურთი აიტაცა და ელვისებური ნახტომით დაალელოვა. ვანოსთვის ეს იყო მე-3 ლელო ჩემპიონატის 11 მატჩში, ხოლო ტოპ 14-ში მისი კარიერული სტატისტიკა ამიერიდან 40 მატჩში 5 ლელოს უდრის.
სამწუხაროდ, „მონპელიე“ ცხრილის ფსკერზე დაეშვა – 12 ქულით მეტის იმედი არც უნდა გქონდეს. 2022 წლის ჩემპიონს „პერპინიანმა“ გადაუსწრო, რომელმაც კასტრში სენსაციურად – 17:13 იმარჯვა და 13 ქულას მოუყარა თავი.კატალონიელთა რიგებში 54-ედან 73-ე წუთამდე ვახტანგ ჯინჭარაძემ პირველად ითამაშა. ამ ბიჭს საქართველოს U20-ის შემადგენლობაში მსოფლიო თასზე შერკინების მეორე ხაზში უთამაშია, მაგრამ თანდათან მარჯვენა ბურჯად გადაკვალიფიცირდა, მერე მარცხნივაც ითამაშა, ახლა კი კვაჭად იქცა. ასეთი ტრანსფორმაცია რაგბში ძალიან დიდი იშვიათობაა. რაც შეეხება „კასტრს“, ვეტერანი ლევან ჩილაჩავა თამაშში 52-ე წუთზე შევიდა. „კასტრს“ 28 ქულა გაუხდა, რაც მე-6, საპლეიოფო ადგილის დასაკავებლად ჯერჯერობით საკმარისია.
ლიდერი კი 35-ქულიანი „რასინგ-92“ გახლავთ, რომელიც „ბაიონთან“ სტუმრად მოულოდნელად დამარცხდა და ბონუსს გამორჩა. 49-ე წუთზე პარიზელთა შემადგენლობაში გურამ გოგიჩაშვილი და გია ხარაიშვილი გამოჩნდნენ. გურამმა 69-ეზე ყვითელი ბარათი „გამოიმუშავა“, რაც მას ზოგადად არ ახასიათებს – ტოპ 14-ში გამართულ აგერ უკვე 78 მატჩში მან მხოლოდ მეორე სინბინი მიიღო.
მე-3 ადგილზე „ტულონია“, რომელმაც „სტად ფრანსეს“ 19:5 სძლია. ტულონელთა შორის ბექა გიგაშვილმა პირველიდან 61-ე წუთამდე ითამაშა, სულ მალე კი მას სამედიცინო ჯოკერის სტატუსით ვასილ ლობჟანიძე შეუერთდება.
და კიდევ, „ლა როშელმა“ ჩემპიონ „ტულუზს“ ბონუსით – 29:8 მოუგო და ამაში 36-წუთიანი წვლილი ახალგაზრდა სანდრო ქუნთელიამ შეიტანა.
პრემიერშიპი
ინგლისის ჩემპიონატში ერთადერთი წარომადგენელი გვყავს – ბორჯღალოსანი ნიკა აბულაძე, ვისმა „ექსეტერმაც“ გასვლით მატჩში „ბრისტოლი“ ბონუსით – 24:14 დაამარცხა და სატურნირო ცხრილში „ნორთჰემპტონისგან“ 1-ქულიანი ჩამორჩენით, მე-2 საფეხურზე,დაფუძნდა, ნიკამ კი ამ მატჩში პირველიდან 53-ე წუთამდე ითამაშა.
