„ძალიან რთული თამაში იყო. საწყენია, რომ ორი წარმოუდგენელი წითელი ბარათი მივიღეთ. ახლა ძალები უნდა აღვიდგინოთ. შემდეგ ტურში ძალიან მნიშვნელოვანი შეხვედრა გველის („ბარსელონასთან”) და მისთვის ძალების აღდგენა დაგვჭირდება. პირველი წითელი ბარათი გაბრიელს ლაპარაკისთვის მისცეს, თუმცა ვფიქრობ მას მსაჯისთვის არაფერი უთქვამს. რას იზამ, ეს ფეხბურთია და ჩვენ არ უნდა გავჩერდეთ. რაც შეეხება ხავი გერას, ისიც შელაპარაკების გამო გააგდეს, ოღონდ მე ვერაფერს ვიტყვი, არაფერი გამიგია.
ვიცოდით, რომ ამ სტადიონზე თამაში რთული იყო. „ხეტაფეს” თავკაცი ხოსე ბორდალასი კი ძალიან ძლიერი მწვრთნელია. სამწუხაროა ისიც, რომ თამაშის ბოლოს გოლი გავუშვით, მაგრამ სხვა რა გზაა, ბრძოლა უნდა განვაგრძოთ”, — თქვა „ხეტაფესა” და „ვალენსიას” შეხვედრის დასრულების შემდეგ ესპანეთის ტელევიზიის მიერ მატჩის საუკეთესო მოთამაშედ დასახელებულმა „ღამურების” ქართველმა მეკარემ გიორგი მამარდაშვილმა.
თუ რატომ დაასახელეს მატჩის საუკეთესო მოთამაშედ მამარდაშვილი ვიდეოჩანაწერიდან ჩინებულად ჩანს, თუმცა ვალენსიური superdeporte-ს აზრით, ეს იყო შეხვედრა, რომელშიც ჩეების მთავარი ვარსკვლავი კვლავ მეკარე გახლდათ, ხოლო გუნდმა, რომელსაც სინგაპურელი პატრონები ცოცხალი თავით არ აძლიერებენ, რეალური სახე გამოაჩინა. გიორგიმ თავისი გუნდი უფრო დიდი ანგარიშით დამარცხებისგან იხსნა.
რაც შეეხება სამ გაძევებას (ორი „ველნსიიდან”, ერთი „ხეტაფედან”), მათი მიზეზი AS-ის თანახმად ასეთი იყო: მსაჯის კუარდა ფერნანდესის განმარტებით გაბრიელ პაულისტამ პირველი ყვითელი ბარათი იმიტომ მიიღო, რომ შორიდან მიეჭრა მას და მეტოქის გაფრთხილება მოსთხოვა, მეორე ყვითელი კი სათამაშო ეპიზოდი გახლდათ. ხავი გერა იმავ მსაჯის თქმით დაისაჯა სიტყვებისთვის: „შენ ცუდად, ძალიან ცუდად სჯი”, ხოლო მასპინძელმა დომინგუშ დუარტემ მეტოქეს ბოზიშვილი უწოდა.
