ევრო 2024-ის C შესარჩევ ჯგუფში გამარჯვებული ინგლისის ნაკრებია, მეორე ადგილისთვის კი ბრძოლა გრძელდება. იტალიამ ჩრდილო მაკედონიას 5:2 მოუგო, რის შედეგადაც 13 ქულით უკრაინასთან მეორე-მესამე ადგილებს იყოფს. შესაბამისად, 20 ნოემბერს ლევერკუზენში უკრაინელებსა და „სკუადრა აძურას” შორის გადამწყვეტი მატჩი გაიმართება.
იტალიელებმა ჩრდილო მაკედონიელებს პირველი ტაიმი 3:0 მოუგეს, არადა 4:0-ის მოგებაც შეეძლოთ — ჟორჟინიომ პენალტი ვერ გაიტანა. შესვენების შემდეგ მაკედონიელებმა ორი გოლით ბრძოლას ინტრიგა დაუბრუნეს (მილან რისტოვსკი და იანი ატანასოვი), მაგრამ ლუჩანო სპალეტის გუნდმა ძალები მოიკრიბა და მონაგარს ორი გოლი დაამატა. მასპინძელთაგან ანგარიში მატეო დარმიანმა გახსნა, შემდეგ ორი გოლი ფედერიკო კიეზამ გაიტანა, რასაც მოჰყვა ჯაკომო რასპადორისა და სტეფან ელ შაარავის შედეგიანი დარტყმები. ხვიჩა კვარაცხელიას თანაგუნდელმა, ნეაპოლელმა რასპადორიმ პირველი გოლის ეპიზოდში დარმიანს ასისტენტობაც გაუწია.
მატჩის შემდეგ სპალეტიმ თქვა: „იტალიამ მთელი 90 წუთი კარგად ითამაშა. სამწიხაროდ ხშირია შემთხვევა, როდესაც გუნდს მოგება გარანტირებული ჰგონია და ბურთისთვის აღარ იბრძვის. ჩვენ ვიცოდით, რომ მეტოქე სტანდარტულ მდგომარეობებში გვჯობდა, ამიტომ, როდესაც კუთხურიდან გოლი გავუშვით, თამაში შედარებით გამოვასწორეთ, მაგრამ ამ დროს მეტოქემ კიდევ ერთი გაგვიტანა. 3:2-მა ფსიქოლოგიურად იმოქმედა. გადამჭრელი ზომები უნდა მიგვეღო. აქ უკვე ჩვენმა ოსტატობამ ითამაშა თავისი როლი. მართალია ჟორჟინიომ კვლავ გააცუდა პენალტი, მაგრამ ამ ეპიზოდში მეტოქის მეკარე უნდა შევაქოთ. ჟორჟინიო კვლავ რჩება იტალიის ნაკრების მთავარ პენალტისტად”.
რასპადორი: „იმ მონაკვეთის გარდა, როდესაც ორი გოლი გავუშვით, მთელი შეხვედრა კარგად ჩავატარეთ. ყველაფერი კარგად გაკეთდა. მომავალში ისე უნდა ვითამაშოთ, როგორც დღეს, პირველ ტაიმში. კარგად ვიცით, რომ მეორე ტაიმში გავაკეთეთ რაღაც ისეთი, რაც არ უნდა გაგვეკეთებინა. „სტადიო ოლიმპიკოზე” ფანტასტიკური ატმოსფერო იყო. ახლა, ორშაბათს გადამწყვეტი შეხვედრა გვაქვს, რომლისთვისაც ძალები მაქსიმალურად უნდა აღვიდგინოთ. უკრაინასთან მტკიცე ხასიათის გამომჟღავნებაა საჭირო. აუცილებლად უნდა მოვიგოთ, რადგან იტალიის ნაკრების მაისურის ტარება დიდი პატივია”.
