საქართველოს მორაგბეთა ეროვნული ნაკრების ხერხემლად მიჩნეულმა „შავმა ლომმა“ პორტუგალიის ნაკრების საბაზო ფრენჩაიზ „ლუზიტანუშს“ სასტიკად გაუსწორდა, მსოფლიო ჩემპიონატზე ფრედ დასრულებული მატჩის გამო ჯავრი იყარა და პორტუგალიაშივე, დედაქალაქ ლისაბონში მშრალი ანგარიშით – 22:0 დაამარცხა.
მიუხედავად იმისა, რომ ქართული ფრენჩაიზის შესრულებით გაცილებით ხარისხიანი რაგბიც გვინახავს, ლევან მაისაშვილის რაზმის უპირატესობა ცხადი და ნათელი მთელი 80 წუთის განმავლობაში იყო. მართალია, ხარვეზი უამრავი იყო, მაგრამ გუნდმა პირველ ტაიმში ორი ლელო მაინც გაიტანა. თავდაპირველად თავი დებიუტანტმა კვაჭმა ირაკლი ქვათაძემ გამოიჩინა, რომელმაც მაგარი მიძალებით დაცვა გაარღვია და ბურთი ლელოში დაამიწა, შემდეგ კი, ქართველების მიერ გაშლილი მარაო ალამთან ახლოს გარემარბმა ოთარ ლაშხმა დაასრულა. ლუკა მატკავამ ორივე გარდასახვა ააცილა და ტაიმი 10:0 დასრულდა.
მეორე ტაიმის დებიუტი პირველი ნახევრის გაგრძელებად იქცა – „შავი ლომი“ მძლავრად უტევდა და თენგიზ პერანიძის ლელოც ამ შტურმის ლოგიკური შედეგი იყო. ამ ჯერზე მატკავამ ზუსტად დაარტყა გარდასახვა და ანგარიში „შავი ლომის“ სასარგებლოდ 17:0 გახდა. ამის მერე მასპინძლები რამდენადმე გამოცოცხლდნენ და მწვავედაც შეუტიეს, თუმცა ქართველების დაცვა შეუვალი იყო.
ასე გაგრძელდა ბოლო წუთამდე. ქართველები უტევდნენ და პორტუგალიელები თავს იცავდნენ. თამაშში მარქაფიდან ჩართულმა კვაჭმა ბექა მამრიკიშვილმა ამ მატჩშიც დადო თავისი ლელო და ანგარიში 22:0 გახადა. ეს გარდასახვაც უზუსტო იყო და აღმოჩნდა, რომ ეს ანგარიში საბოლოოა. ბოლო წუთებზე პორტუგალიელებმა ძალები მოიკრიბეს და მწვავედაც შეუტიეს, თუმცა „შავმა ლომმა“ დაცვაში უზუსტესად ითამაშა და მასპინძლები უქულოდ დატოვა.
„შავმა ლომმა“ ბონუსიც მიიღო, ორ მატჩში 10 ქულას მოუყარა თავი და ნახევარფინალში გასვლაც ერთი ტურით ადრე გაინაღდა. მომავალ შაბათს ქართული ფრენჩაიზი ისრაელის „თელ ავივ ჰითს“ ესტუმრება, თუმცა სტუმრობა ნომინალური იქნება, რადგან ცნობილ მიზეზთა გამო „ჰითი“ საშინაო მატჩებს შინ ვერ ატარებს და ქართველებს კვიპროსულ ლიმასოლში უმასპინძლებს, სადაც საკმაოდ მრავალრიცხოვანი ქართული სათვისტომო ისრაელის ფრენჩაიზს ამ მასპინძლობას სტუმრობად აუცილებლად გადაუქცევს.
ლუზიტანუში – შავი ლომი 0:22
შავი ლომის შემადგენლობა:
- დათო აბდუშელიშვილი, 2. ირაკლი ქვათაძე, 3. ნიკა ხატიაშვილი, 4. გრიგორ ქერდიყოშვილი, 5. მიხეილ ბაბუნაშვილი, 6. ლუკა ივანიშვილი, 7. სანდრო მამამთავრიშვილი, 8. ილია სპანდერაშვილი, 9. თენგიზ პერანიძე, 10. ლუკა მატკავა, 11. ოთარ ლაშხი, 12. მერაბ შარიქაძე (კაპიტანი), 13. გიორგი კვესელაძე, 14. აკაკი ტაბუცაძე, 15. ლუკა ცირეკიძე.
შეცვლაზე შევიდნენ: 16. ბექა მამრიკიშვილი, 17. მიხეილ ნარიაშვილი, 18. ბაჩუკი ჭუმბაძე, 19. დემურ ეფრემიძე, 20. გიორგი კერვალიშვილი, 21. გიორგი მარგალიტაძე, 22. თორნიკე კახოიძე, 23. შალვა აფციაური.
