ვიქტორ ოსიმენი ტრავმას იშუშებს. „ფრანს ფუტბოლის” გამოკითხვით მსოფლიოს მე-8 ფეხბურთელი „ნაპოლიმ” ოჯახური პრობლემების მოსაგვარებლად ნიგერიაში გაუშვა, მის შესახებ კი ჟურნალისტებს ქვეყნის ნაკრების მწვრთნელი ჟოზე პესეირუ ელაპარაკა.
„შეუძლებელია იმის დაჟინება, რომ ოსიმენი სამუდამოდ „ნაპოლიში” დარჩება, — თქვა პესეირუმ, — დღეს ის ბედნიერია. ვინაიდან „ნაპოლის” ჩემპიონობას არავინ ელოდა, ამ გუნდთან ერთად გამარჯვება „მილანთან”, „ინტერთან” ან „მანჩესტერ სიტისთან” ერთად გამარჯვებაზე მომხიბვლელია. მეტსაც გეტყვით, ახლა ვიქტორს მარადონას ადარებენ: ადრე „ნაპოლი” მარადონას ერთად გახდა იტალიის ჩემპიონი, ახლა — ოსიმენთან ერთად, თუმცა თანამედროვე ბიზნესში ყველაფერი ხდება. თუ მას და კლუბს სარფიანი წინადადებით მიმართავენ, შეიძლება გადავიდეს კიდეც სხვაგან. მეტიც, მან შეიძლება არა მარტო გუნდი არამედ ქვეყანაც შეიცვალოს. თუმცა, იტალიისთვის ვიქტორთან განშორება ცუდი იქნება. იყო დრო, როდესაც იტალიაში მსოფლიოს საუკეთესო ფეხბურთელები თამაშობდნენ, მაგრამ დღეს პრემიერლიგასა და სხვა ევროპულ ქვეყნებში მეტი ფული ტრიალებს.
ოსიმენი ტრავმის გამო უგუნებოდაა. ეს ჩვენთვის და იტალიის ჩემპიონატისთვისაც ძალიან ცუდია. ბოლო კვირები იოლი არ იყო. დაირხა უამრავი ხმა იმის შესახებ, რომ ის ახალ კონტრაქტს აწერს ხელს, გაავრცელეს სხვადასხვა სატრანსფერო ჭორი, ერთი ამბავი იყო ტიკტოკზე. მე მხოლოდ ის შემიძლია გითხრათ, რომ ოსიმენს ერთი სული აქვს, მოედანზე როდის დაბრუნდება”.
