გიორგი მამარდაშვილის „ვალენსიამ” კვირას „გრანადას” 1:0 მოუგო. „ღამურებმა” გამარჯვების გოლი უგო დუროს მიერ 45+7 წუთზე მოპოვებული საეჭვო პენალტით გაიტანეს. როგორც ირკვევა, ამან მეტოქეებს, კერძოდ კი „გრანადას” მწვრთნელ პაკო ლოპესსა და დუროს შორის დაძაბულობა გამოიწვია. ინციდენტი ტელეკომპანია DAZN-ის კამერებმა დააფიქსირა.
როდესაც მსაჯმა გარსია ვერდურამ პირველი ტაიმი ისე დაამთავრა, რომ სტუმრებს თამაში ცენტრიდანაც კი არ გააგრძელებინა, პაკო ლოპესმა მას დაუძახა: „ჩავისვარეთ, უფროსო!” ამ დროს დურო გასახდელისკენ მიდიოდა და მეტოქეთა მწვრთნელის დასანახად ტუჩებზე ხელი მიიფარა, გაჩუმდიო. ვალენსიელის ჟესტმა ლოპესი წყობიდან გამოიყვანა.
DAZN-ის ჩანაწერში ჩანს, რომ საქმეში „ვალენსიას” ფეხბურთელები გაბრიელ პაულისტა და ტიერი კორეია ჩაერივნენ, რომელთაც დურო გასახდელში წაიყვანეს. იმავდროულად ტექნიკურმა პერსონალმა მხარეებს ახალი დაძაბულობის გაღვივების საშუალება არ მისცა. შემდეგ „გარანას” მწვრთნელს დუროსთან ჩხუბი დაავიწყდა და მსაჯთა სამეულთან მივიდა. აქ მან უკვე მშვიდად იკითხა: „ის რაც თქვენ დანიშნეთ პენალტი იყო?” მსაჯებს პასუხი არ გაუციათ.
აღსანიშნავია, რომ გარსია ვერდურამ ლოპესისა და დუროს გაწევ-გამოწევა შეხვედრის ოქმში არ შეიტანა.
