იტალიის ნაკრებმა ჩრდილოეთ მაკედონიაში 1:1 ითამაშა, რამაც ლუჩანო სპალეტის დებიუტს ჩრდილი მიაყენა, „სკუადრა აძურას” სატურნირო მდგომარეობა კი დაამძიმა. ანგარიში 47-ე წუთზე ჩირო იმობილემ გახსნა, ხოლო 82-ე წუთზე „ტრაბზონსფორის” ნახევარმცველმა ენის ბარდიმ გაათანაბრა. მატჩის შემდეგ სპალეტიმ თქვა:
…ჩვენ გადმოგდებული, ასხლეტილი ეგრეთწოდებული მეორე ბურთების მოპოვება გაგვიჭირდა. გუნდურ ბლოკებს ვერ ვაყენებდით. სხვა მხრივ ცუდად არ გვითამაშია. უარესიც შეიძლებოდა მომხდარიყო…
…უკრაინასთან მნიშვნელოვანი შეხვედრები გველის. მანამდე კი დღევანდელი მატჩის ჩანაწერს შევისწავლით და ვნახავთ, რის გამოსწორება შეიგვიძლია. მე ყოველთვის ცოტა მძინავს, ამიტომ ეს ჩემი სანაკრებო დებიუტის ბრალი არ იქნება. დღევანდელ შეხვედრას მაღალი ემოციური ფონი ახლდა, რადგან მას მთელს მსოფლიოში გადასცემდნენ. ჩვენი თამაში იტალიის გარეთ უამრავმა ადამიანმა ნახა. გულშემატკივრები ყველაფერს შეაფასებენ…
…ვცადეთ გვეთამაშა როგორც შეგვეძლო. უფრო ხარისხიანი ფეხბურთის ჩვენებაც შეიძლებოდა, მაგრამ მეტოქის დაცვის ხაზის გადალახვა გაგვიჭირდა. ჩვენი თამაშის ხარისხი ცუდმა მოედანმა დაწია…
…ამ შეხვედრის შედეგით უკმაყოფილოები იმიტომ ვართ, რომ მოგება შეგვეძლო, მაგრამ ის ანალიზისთვის ნოყიერ ნიადაგს შეიცავს. ჩვენ ყველაფერს გავაანალიზებთ, დასკვნებს გამოვიტანთ. აუცილებლად მივხვდებით, თუ რის გაძლიერება გვჭირდება მომავალში. დიდ დახმარებას გაგვიწევს ჩანაწერები, რომელთაც ახლა ჩავუჯდებით…
…უხარისხო მოედანმა თამაშს დაღი დაასვა. მან გარემარბები გადაადგილებაში შეზღუდა. შეცვლები? ბევრი ყვითელი ბარათი გვქონდა და თავის დაზღვევის მიზნით ვინმე უნდა შეგვეცვალა. გარდა ამისა, განაპირა მცველების გააქტიურება მინდოდა…
…თუ ფიზიკურ ორთაბრძოლებს არ ჩავთვლით, რომლებმაც სირთულეები შეგვიქმნა, სხვა მხრივ ზუსტად ვითამაშეთ, ბურთი კარგად ვაგორეთ, მეტოქეს მჭიდროდ დავუდექით. ჩრდილოეთ მაკედონიის ფაქტორმა თუ დაგვთრგუნა? ჩვენ ფსიქოლოგიურად ძლიერები ვართ. დაუფარავად შეგვიძლია ვაჩვენოთ, თუ რას ვუმიზნებთ. ასე რომ არ იყოს, გაცილებით დიდ წინააღმდეგობებს წავაწყდებოდით. ჩვენ ძლიერები ვართ, გვაქვს დიდი ისტორია, იტალიაში კვლავაც იზრდებიან ფეხბურთელთა ახალი თაობები და ამიტომაც უნდა დავიკავით ის ადგილი, რომელიც ისტორიულად გვეკუთვნის…
…გოლის გაშვების შემდეგ შეგვეძლო მეტოქის საჯარიმოს მისადგომებთან უკეთესი სიტუაციები შეგვექმნა. ბურთს კარგად ვათამაშებდით, მაგრამ ბოლოს სწორ პასს ვეღარ ვაკეთებდით…
