კალათბურთის მსოფლიოს ჩემპიონატზე მეორე ტურის დარჩენილი მატჩები გაიმართა და კიდევ სამმა გუნდმა მოიპოვა შემდეგ ეტაპზე თამაშის უფლება. ერთ-ერთი სლოვენიაა, რომელმაც საქართველოს 88:67 მოუგო. ჯგუფში მეორე საგზურის ბედი სამ გუნდში უნდა გადაწყდეს, სადაც საქართველოს ყველაზე კარგი შანსი აქვს.
მეორე ეტაპზეა ესპანეთის ნაკრებიც, რომელმაც ბრაზილიას 96:78 აჯობა და G ჯგუფს 4 ქულით ლიდერობს. ჯგუფის მეორე საგზურის ბედს ერთმანეთში ბრაზილია და კოტ დივუარი ბოლო ტურში გაარკვევენ. კოტ დივუარმა დღეს იორდანიას დაძაბულ ბრძოლაში, 71:69 მოუგო.
C ჯგუფში შემდეგ ეტაპზე აშშ-ის ნაკრები გავიდა, რომელმაც დღეს საბერძნეთი არ დაინდო და 109:81 გაანადგურა. ამერიკელებს 4 ქულა აქვთ. აქ მეორე ადგილისთვის საბერძნეთი და ახალი ზელანდია იბრძოლებენ.
შემდეგ ეტაპზე გამსვლელი გუნდის ვინაობა ჯერ გაურკვეველია B ჯგუფში. აქ ყველაზე კარგი შანსი სერბეთს აქვს, რომელმაც 4 ქულა აიღო და ბოლო ტურში 3-ქულიან სამხრეთ სუდანს ეთამაშება. ამავე ჯგუფში ერთმანეთში გაარკვევენ ურთიერთობას პუერტო რიკო (3 ქულა) და ჩინეთი (2). აქ ფავორიტი ამერიკის კონტინენტის წარმომადგენლია.
