დეჟავიუ

დეჟავიუ ფრანგული სიტყვაა და „უკვე ნანახს“ ნიშნავს. ეს სიტყვა ბოლო წლებში ზუსტად შეესაბამება ჩვენ შინაურ ფეხბურთს: ეროვნულ ჩემპიონატში საზაფხულო შესვენება ცხადდება, ჩვენი კლუბები ევროთასების გათამაშებაში ერთვებიან და ისევ უსირცხვილოდ ვარდებიან. ერთი გორის „დილა“ შემოგვრჩა და მისი იმედი გვაქვს. სწორედ ამიტომ გადაიდო გორელთა მე-19 ტურის საშინაო მატჩი „დინამოსთან.“ ანდრი დემჩენკოს გუნდი ხუთშაბათს, 10 აგვისტოს, კონფერენციის ლიგის მესამე საკვალიფიკაციო რაუნდში „დინამო არენაზე“ კვიპროსის „აპოელს“ დაუპირისპირდება.

ტურის ამბები შოვში მომხდარმა საშინელმა ტრაგედიამ გადაფარა. ყველა მატჩი წუთიერი დუმილით დაიწყო…

ლიდერმა „ბათუმმა“ შინ, ფაქტობრივად, ცარიელი ტრიბუნების წინ (ბათუმელთა ქომაგები – პირატები სტადიონზე მისვლას არ აპირებენ, მანამ გუნდის მთავარი მწვრთნელი, გია გეგუჩაძე პოსტს არ დატოვებს) ერთ-ერთი აუტსაიდერი, მეზობელი „შუქურა“ 5:0 გაანადგურა და უშუალო მდევარ „საბურთალოს“ 7 ქულით გაუსწრო.

მოგვიანებით საბურთალოელებმა მოულოდნელად შინ „ტორპედოსთან“ 1:3 წააგეს. თბილისური კლუბი „მიხეილ მესხის“ სათადარიგო მინდორზე დაბრუნდა რეკონსტრუქციის შემდეგ.

„შუქურას“ კი, თითქოს პრობლემები არ ეყოფოდაო, 6 ქულა დააკლეს. მიზეზი მწვრთნელ-ფეხბურთელების მიმართ ფინანსური დავალიანებაა. ქობულეთურ კლუბს ახლა როგორც თავად გვამცნობენ, მხოლოდ ოთხი მწვრთნელის მიმართ დარჩა დავალიანება.

ერთი კითხვა არ გვასვენებს: წესით, სეზონის წინ ყველა კლუბმა ფინანსური გარანტიები უნდა წარადგინოს ფეხბურთის ფედერაციაში, წინააღმდეგ შემთხვევაში, მათ ჩემპიონატში თამაშის  უფლება არ უნდა მისცენ. მაგრამ უკვე მერამდენე წელიწადია შუა სეზონში ლიგის ლამის ნახევარი გუნდები დაშლის პირას აღმოჩნდებიან ხოლმე, მერე 10-11 ფეხბურთელი სხვაგან მიდის, ამდენივე საიდანღაც მოჰყავთ… რომელ წარმატებაზე და სტაბილურობაზეა საუბარი.

„თელავმა“ უშუალო კონკურენტ „სამტრედიას“ სტუმრად 2:0 მოუგო და მნიშვნელოვანი სამი ქულა ჩაიწერა აქტივში.

დავით პეტრიაშვილის სახელობის განახლებულ სტადიონზე „გაგრამ“ „სამგურალს“ უმასპინძლა და უგოლოდ დაშორდა – 0:0. „გაგრაში“ მთავარი მწვრთნელის პოსტზე „გარეჯის“ ყოფილი დამრიგებლის, გიორგი ონიანის დებიუტი შედგა.

გაგრა 0:0 სამგურალი

ბათუმი 5:0 შუქურა

1:0 მამუჩაშვილი (38 პენ), 2:0 ბიძინაშვილი (47), 3:0 კობახიძე (54), 4:0 ვაწაძე (61), 5:0 ხარაბაძე (85)

სამტრედია 0:2 თელავი

0:1 ბეგიჩი (45+4), 0:2 რუხაძე (83 პენ)

საბურთალო 1:3 ტორპედო

1:0 სილა (32), 1:1 კაბალიერო (58 პენ), 1:2 ჯგერენაია (63 საკ. კარში), 1:3 ეკონგოლო (90)

დილა – დინამო  გადაიდო

შუქურას დაკლებული აქვს 6 ქულა

მეგოლეები: ჯოვინო ფლამარიონი (ბათუმი) – 13, ტიერი გეილი (დილა) – 10, ვლადიმერ მამუჩაშვილი (ბათუმი), გიორგი ნიქაბაძე (სამგურალი), ულად ომარ იმრანი (დინამო) – 9