რადიოწამყვანმა ჯუზეპე ფალკაომ Areanapoli.it-ს „ნაპოლიში” კიმ ნიმ-ჯაეს შემცვლელზე, ბრაზილიელ ნატანზე უთხრა ორიოდ სიტყვა. მისი „აძურიში” გადასვლა გადაწყვეტილ ამბად არის მიჩნეული.
„მე ნატანს ვიცნობ, რადგან შარშან „რომა” ცაცია მცველს ეძებდა და მისი ყურადღება სწორედ ამ 22 წლის ბრაზილიელმა მიიპყრო. მაშინ ალდაირს ვკითხე რას ფიქრობდა მასზე. პასუხად მივიღე, რომ ის ძალიან ახალგაზრდა და პერსპექტიულია. „ბრაგანტინო” „რედ ბულის” კლუბია და ნატანი ამიტომ ღირს შედარებით ძვირი.
ნატანის თვისებებიდან უნდა გამოვყოთ პერსონალურად თამაშის ნიჭი. მას მეტოქე ძნელად უსხლტება. გარდა ამისა, ბრაზილიელი სწრაფია და ჩემი აზრით რაღაცით კიმს ჰგავს. კიმის უპირატესობა ის იყო, რომ ევროპულ ფეხბურთში თამაშის გამოცდილება ჰქონდა, რასაც ბრაზილიელი მოკლებულია.
„რომას” დაცვა სამი მცველისგენ შედგებოდა. „ჯალოროსის” ნატანი მეოთხე-მეხუთე კაცად სჭირდებოდა. „ნაპოლის” კი ის სასტარტო შემადგენლობისთვის უნდა. ამისათვის ის ვალდებულია მოუმატოს. საქმე ის არის, რომ მას უარყოფითი თვისებებიც აქვს და ერთი მათგანი ყურადღების გაფანტვაა. ნატანი ყოველთვის მობილიზებული არ არის. ფასით თუ ვიმსჯელებთ, ვფიქრობ 10 მილიონი ასეთი ფეხბურთელისთვის ძალიან კარგი თანხაა, მაგრამ ნურავინ ელის, რომ ის კიმის შეცვლას დღესვე შეძლებს. ბრაზილიელი უფრო სწრაფი და ტექნიკურია, მაგრამ როგორც მცველი ჯერ ჩამოუვარდება.
ნატანმა კარიერა „ფლამენგოს” ახაალგაზრდულ გუნდში დაიწყო. დიდ ფეხბურთში დებიუტიც „ფლამენგოში” ჰქონდა. საჭიროების შემთხვევაში მას განაპირა მცველის პოზიციაზეც შეუძლია თამაში. ვიმეორებ, თავს ვერ დავდებ, რომ ის სერია A-ში სათამაშოდ უკვე მზად არის. „ნაპოლის” მოთმინება და ფეხბურთელისადმი ნდობის გამოვლენა სჭირდება”.
