უნგრეთის დედაქალაქ ბუდაპეშტში მიმდინარე ძიუდოისტთა მასტერსის მეორე დღეს საქართველოს დელეგაციამ ორი ბრინჯაოს მედალი მოიპოვა.
73 კილოგრამამდე წონით კატეგორიაში გარანტირებული ბრინჯაო გვქონდა, რადგან ერთმანეთს ლაშა შავდათუაშვილი და გიორგი ტერაშვილი ეჭიდავებოდნენ. ბრინჯაოს ფინალამდე ორივე ძიუდოისტი განსხვავებული გზებით მივიდა: 20 წლის ტერაშვილმა მეორე წრეში უზბეკ ობიდხონ ნომონოვს აჯობა; შემდეგ გამოცდილი აზერბაიჯანელი ჰიდიატ ჰეიდაროვი დაამარცხა; მეოთხედფინალში რუმინელ პეტრუ პელივანს დამატებით დროში სძლია; ნახევარფინალში კი, ასევე დამატებით დროში ტაჯიკ ბეჰრუზი ხოჯაზოდას დამარცხდა… შავდათუაშვილმა უფრო რთული გზა გაიარა: კუბელ მაგდიელ ესტრადასა და გერმანელი იგორ ვანდკეს ძლევის შემდეგ, მეოთხედფინალში უზბეკ მუროდჟონ იულდოშევთან გაფრთხილებებით დამარცხდა და რეპეშაჟში გადაინაცვლა, სადაც კოსოვოელ აკილ იგაკოვას იპონით აჯობა და ტერაშვილზე გავიდა.
ბრინჯაო უფრო გამოცდილმა შავდათუაშვილმა მოიგო.
81 კილოგრამამდე წონით კატეგორიაში მოჭიდავე გრიგალაშვილმა მეორე წრეში ყაზახ აბილაიხან ჟუბანაზარს იპონით მოუგო; შემდეგ არაბეთის გაერთიანებული საამიროების სახელით მოჭიდავე ნუგზარ ტატალაშვილს გაფრთხილებებით აჯობა; ნახევარფინალში, ბრაზილიელ გილერმო შიმიდტთან ჩვენებურმა გაფრთხილებებით, დამატებით დროში წააგო; გრიგალაშვილმა ბრინჯაოსთვის ბრძოლაში იაპონელ კენია კოჰარა დაამარცხა და მედლის გარეშე არ დაბრუნდა. ხვალ კიდევ რამდენიმე ქართველ ძიუდოისტს ვიხილავთ: ლუკა მაისურაძე, ლაშა ბექაური (ორივე 90); ილიას სულამანიძე, ონისე სანებლიძე (ორივე 100); გურამ თუშიშვილი, საბა ინანეიშვილი, გელა ზაალიშვილი (ყველა +100).
