სლოვაკეთისა და საქართველოს ნაკრებების ყოფილმა თავკაცმა ვლადიმირ ვაისმა calcionapoli24-ისთვის, კერძოდ კი ჯანლუკა დი მარცოსთვის მიცემულ ინტერვიუში თავის ყოფილ ფეხბურთელებზე ილაპარაკა — მილან შკრინიარით დაწყებული, სტანისლავ ლობოტკათი და ხვიჩა კვარაცხელიათი დამთავრებული. დი მარცო ვაისს იგონებს, როგორც სპეციალისტს, რომელმაც მსოფლიოს 2010 წლის ჩემპიონატზე მარჩელო ლიპის იტალიას 3:2 მოუგო.
„მან იმთავითვე შკრინიარსა და ლობოტკაზე დაიწყო ლაპარაკი”, — წერს ჟურნალისტი და შემდეგ სლოვაკი მწვრთნელის სიტყვები მოჰყავს:
„ერთ ამბავს მოგიყვებით. ექვსი თუ შვიდი წლის წინ, როდესაც საქართველოს ნაკრებს ვთავკაცობდი, ავსტრიაში ამხანაგური შეხვედრა გავმართეთ სლოვაკეთთან. მაშინ, სლოვაკეთის ნაკრებში ჩემი შვილი ვლადი თამაშობდა. მატჩის შემდეგ, სასტუმროს ფოიეში შკრინიარსა და ლობოტკას შევხვდი, რომელთაც პირდაპირ ვუთხარი, რომ ისინი ძალიან ნიჭიერები იყვნენ და დიდი ფეხბურთელები გახდებოდნენ…
…გასულ სეზონში ლობოტკა ევროპის ერთ-ერთი საუკეთესო ექვსი ნომერი იყო. ის თამაშობდა „ნაპოლიში”, ფანტასტიკურ კლუბში, რომელსაც დიდებული გულშემატკივარი ჰყავს და სადაც მარადონამ და ჰამშიკმა ისტორია დაწერეს”.
გასულ სეზონში „ნაპოლის” მთავარი ვარსკვლავები ოსიმენი და კვარა იყვნენ, მაგრამ ვაისი ლობოტკას მნიშვნელოვნებასაც უსვამს ხაზს:
„ნაპოლიში” გადავიდა, ლობოტკა გუნდის საკვანძო ფეხბურთელი არ იყო. გატუზოს დროს მეტწილად სათადარიგოთა სკამზე იჯდა. შემდეგ მოვიდა სპალეტი, რომელმაც მას საკუთარი თავის რწმენა შეჰმატა და ეს გარდამტეხი აღმოჩნდა. დღეს „ნაპოლის” კომბინაციებს ლობოტკა იწყებს. ის ფანტასტიკურად ამაგრებს პოზიციას. სტანისლავი „ნაპოლისთვის” უმნიშვნელოვანესი მოთამაშეა.
კვარამ კი ნაკრებში თავისი პირველი მატჩი ჩემს ხელში ჩაატარა. მაშინ ის 18 წლის იყო და „რუბინში” თამაშობდა. მასაც გასაოცარი კარიერა აქვს. როდესაც მკითხეს, იყო თუ არა მზად „ნაპოლისა” და სერია A-ში სათამაშოდ, მე ვუპასუხე, რომ თუ თავში არ აუვარდებოდა, ვარსკვლავი გახდებოდა. დღეს ამაყი ვარ, რომ ის სერია A-ს საუკეთესო ფეხბურთელი გახდა.
ვიცი, კვარას ბევრი კლუბი ეპატიჟება, მაგრამ ნეაპოლელებს ის უყვართ. თან ნეაპოლი ზღაპრული ქალაქია. ორიოდ დღის წინ თავიდან ვუყურე „ნაპოლისა” და „ლივერპულის” შეხვედრას და აღვფრთოვანდი. ტაქტიკურად პირველ ტაიმში სპალეტის გუნდი უნაკლო იყო. მან თავისი ტოტალური ფეხბურთით ინგლისელები დაჯაბნა”.
გაბრწყინების სეზონის შემდეგ, კვარას მეორე სეზონში გამოცდა ელის. მეტოქეებს მისი თამაში უკვე შესწავლილი აქვთ და იციან, როგორ დაიცვან თავი.
ვაისი: „შესაძლოა ასე იყოს… თუმცა, შეიძლება ის კიდევ უფრო ძლიერი მოგვევლინოს. წინა სეზონში მას იტალიური ფეხბურთის შესწავლა მოუხდა. იტალიური ფეხბურთი კი რუსული და ქართული ფეხბურთისგან განსხვავდება. როდესაც კაცს ატყუებს ან როდესაც ორ მოწინააღმდეგეზე მიდის, კვარა შეუდარებელია. დაცვით ფაზაში აქვს თამაში დასახვეწი.
…ჯორჯ ბესტთან შედარებაზე? რა გითხრათ, აბა. ჯორჯ ბესტი ჯორჯ ბესტი იყო, კვარა კი კვარაა. ის ფანტასტიკური ბიჭია და დღეს საქართველოში ნამდვილი ვარსკვლავია. სამწუხაროდ, მე მასთან ერთი უიღბლობის ისტორია მაკავშირებს.
ჩრდილო მაკედონიასთან გადამწყვეტი ფლეი-ოფის წინ კვარას კოვიდი შეეყარა და დიდი ოცნება დაიმსხვრა. ეს ქართული ფეხბურთისთვის და პირადად ჩემთვის ტრაგედია იყო. ეჭვი არ მეპარება, მას რომ ეთამაშა, ჩვენ ევრო 2020-ზე გავიდოდით. კვარას გარეშე კი პანდევმა დაგვამარცხა. ეს ჩემი ცხოვრების ძალიან ცუდი დღე იყო. ერთი ნაბიჯიღა გვაკლდა…”
შკრინიარის გადაწყვეტილებაზე „ინტერიდან” „პარი სენ ჟერმენში” გადასულიყო, ვაისმა თქვა: „მას კონტრაქტის ბოლო წელიწადი ჰქონდა, თამანედროვე ფეხბურთი კი ფულის გარშემო ტრიალებს. როდესაც „ინტერში” მივიდა, კარგი ფეხბურთელი იყო, დღეს კი მილანი ვარსკვლავია. ის დიდებული ცენტრალური მცველია, რომელმაც ასეთ დონეს დიდი შრომის წყალობით მიაღწია. ვნახოთ, როგორ წავა მისი საქმე პარიზში. ფრანგული ფეხბურთი იტალიურზე სწრაფია. სერია A-ში კი ტაქტიკას ანიჭებენ დიდ ყურადღებას. „ინტერი” სამი მცველით თამაშობდა, „პარი სენ ჟერმენი” ოთხი მცველით თამაშობს… დარწმუნებული ვარ, ლუის ენრიკეს ხელში პარიზელები უკეთ ათამაშდებიან და მილანი ამაში თავის დიდ წვლილს შეიტანს. მას და ლობოტკას ვუსურვებ ოცნებები აიხდინონ და წარმატებებს მიაღწიონ ისეთ დიდ კლუბებში, როგორებიც „პარი სენ ჟერმენი” და „ნაპოლი” არიან.
