დაასვენეთ ბარახა ორი დღით

გიორგი მამარდაშვილის „ვალენსიამ” ბოლო ტურში სტუმრად „ბეტისთან” 1:1 ითამაშა და ლა ლიგიდან გავარდნას გადარჩა. „ღამურების” მწვრთნელი რუბენ ბარახა მატჩის შემდგომ პრეს-კონფერენციაზეც ისეთივე გადაღლილი სახით იჯდა, როგორც ბოლო მატჩების დროს მოედნის კიდესთან, თუმცა გუნდი ფიასკოს გადაარჩინა, რაც იმას ნიშნავს, რომ მის წინაშე დასახული ამოცანა შესრულებულია. სხვა საქმეა, რომ „ვალენსიას” ლეგენდამ გასაგებად მიანიშნა: სამომავლოდ კლუბმა საქმისადმი დამოკიდებულება უნდა შეცვალოს, თორემ…

…დღეს ლა ლიგაში ადგილი რომ შევინარჩუნეთ, გულშემატკივრების დამსახურებაა. მათ იგრძნეს მომენტის დელიკატურობა და მხარი დაგვიჭირეს. გუნდს ტრიბუნებიდან დიდი სიყვარული ეხმარებოდა. გადამწყვეტი სწორედ ეს იყო. ახლა ზეიმის დრო არ არის. „ვალენსიას” წინაშე სხვა მოთხოვნებია. როდესაც გუნდს სათავეში ჩავუდექით, ის რეალური პრობლემებების წინაშე იდგა, მაგრამ გულშემატკივრის სიყვარულითა და მხარდაჭერით გარკვეულ სტაბილურობას მივაღწიეთ.

…გავაგრძელებ თუ არა „ვალენსიაში” მუშაობას? ამწუთას მეტისმეტად დაღლილი ვარ. ფეხბურთელების იმაში დარწმუნებას, რომ პირველივე წუთზე გაშვებული გოლის შემდეგ თამაშის შემოტრიალება შეგვეძლო, დიდი ენერგია შევალიეთ. ახლა ორიოდ დღით დასვენება მჭირდება. ყველაფერი უნდა გავაანალიზო. „ვალენსია” ჩემი საყვარელი კლუბია. ჩვენ აუცილებლად დავილაპარაკებთ ყველა საჭირბოროტო საკითხზე, მაგრამ მანამდე უნდა დავისვენო.

…ჩვენ უნდა გავცეთ პასუხი კითხვას, თუ რატომ მივიდა საქმე იქამდე, რომ გუნდის ლა ლიგაში დარჩენის საკითხი მხოლოდ ბოლო ტურში გადაწყდა. მიზეზები უნდა დავინახოთ. დიდი თვითკრიტიკაა საჭირო. მომხდარი გაკვეთილად უნდა გამოგვადგეს. ბევრი რამ შესაცვლელი იქნება. საჭიროა მაქსიმალური მობილიზება და ეს ეხება ყველას, მეგარდერობეთი დაწყებული ფეხბურთელებით დამთავრებული.

…მეპატრონისთვის წარსადგენი ანალიზი თუ მაქვს მზად? ჩემთვის ანალიზს რასაკვირველია ვაკეთებდი, მაგრამ ახლა, როგორც გითხარით, ორდღიანი დასვენება მჭირდება. ბოლო პერიოდი ყველა გაგებით ძალიან ძნელი იყო. მინდა მადლობა ვუთხრა ჩემთვის მნიშვნელოვან ხალხს, ვინს გვერდში მედგა და მამხნევებდა: ოჯახი, შვილები, ძმები.

…ჩვენს გადარჩენაში განსაკუთრებული როლი შეასრულა „მესტალიამ”. შინ დავამარცხეთ „რეალ სოსიედადი”, „ოსასუნა”, „რეალი”… როდესაც გუნდი ჩავიბარე, ნათელი იყო, რომ გადამწყვეტი „მესტალიაზე” თამაში იქნებოდა. რასაკვირველია, სტუმრადაც გავიმარჯვეთ, მაგრამ მთავარი შინ მოგება იყო.

…ახალი ძალა, ენერგია, იმპულსი ადგილობრივმა ახალგაზრდობამ მოგვცა. ამის თვალსაჩინო მაგალითი გახლდათ დღევანდელი მატჩიც, რომელშიც გოლი დიეგო ლოპესმა გაიტანა. მისი როლი ამ შეხვედრაში უმნიშვნელოვანესი იყო.

…ვერ გეტყვით, ათბალიანი სისტემით რამდენად უნდა გარდაიქმნას კლუბი, რათა ის, რაც წლეულს მოხდა აღარ განმეორდეს. ჩვენ სეგუნდა დივიზიონში ვვარდებოდით. ამ პოზიციიდან ჩემპიონთა ლიგაში გამსვლელი ადგილის მოპოვება შეუძლებელია, მაგრამ პროგრესი უნდა შევძლოთ. „ვალენსიამ” მისთვის საკადრისი პროექტი შეიმუშაოს.