რა ხდება გიორგი მამარდაშვილის „ვალენსიაში”? საქმე კარგად რომ არ მიდის იქიდანაც ჩანს, რომ გუნდის ლა ლიგაში დარჩენის საკითხი ბოლო ტურში უნდა გაირკვეს, თუმცა ამჯერად თქვენი ყურადღება სხვა რამეზე გვინდა გავამახვილოთ. „ღამურების” ყოფილმა ვარსკვლავმა, მეკარე სანტიაგო კანისარესმა თავისი ყოფილი თანაგუნდელი, მწვრთნელი რუბენ ბარახა გააკრიტიკა. კანისარესი ბარახას პირველად არ აკრიტიკებს. ყოფილ გოლკიპერს მიაჩნია, რომ პიპო მომდევნო სეზონში გუნდის სათავეში არ უნდა დარჩეს.
ბარახამ „ვალენსიას” გაძღოლა სულ რამდენიმე თვის წინ იტვირთა. ის მიმდინარე სეზონში გუნდის მესამე თავკაცია ჯენარო გატუზოსა და ვოროს შემდეგ. არ არის გამორიცხული მან თავისი ამოცანა — „ჩეების” ლა ლიგაში დატოვება — შეასრულოს, მაგრამ კანისარესი ამბობს, რომ საქმე მაინც გამოცდილ სპეციალისტს უნდა ჩაბარდეს.
„ბარახამ გუნდი გავარდნას რომც გადაარჩინოს, მე მასთან კონტრაქტს არ გავაგრძელებდი, — უთხრა მან რადიო Cadena COPE-ს გადაცემა Tiempo de Juego-ს, — ჩემზე რომ იყოს დამოკიდებული გამოცდილ მწვრთნელს მოვძებნიდი. „ვალენსიას” დღეს გამოცდილი ხელმძღვანელი სჭირდება. ვთქვათ, ბორდალასი ან მარსელინო”.
superdeporte იხსენებს, რომ გატუზოს გაშვების შემდეგ კლუბმა მხსნელად ვორო მოიყვანა, მაგრამ მალევე დარწმუნდა, რომ საქმეს ვერც ის უშველიდა. კანისარესმა მაშინაც გასულ სეზონში გაშვებული ხოსე ბორდალასის დაბრუნება მოითხოვა. ახლა ეს ალბათ აღარ გამოვა, რადგან ალიკანტელი სპეციალისტი „ხეტაფეს” უდგას სათავეში. „ხეტაფეს” და „ვალენსიას” ქულათა თანაბარი რაოდენობა აქვთ — 41. „ვალენსია” სტუმრად თამაშობს „ბეტისთან”, ხოლო „ხეტაფე” ასევე გადარჩენისთვის მებრძოლ „ვალიადოლიდს” უნდა ესტუმროს. ბორდალასი „ხეტაფეს” სათავეში ცოტა ხნის წინ ჩაუდგა, როდესაც კლუბმა კიკე სანჩეს ფლორესი გაუშვა. რა მოხდება იმ შემთხვევაში თუ „ხეტაფე” სეგუნდა დივიზიონში დარჩება, არავინ იცის. ბოდრალასიმა შესაძლოა კლუბი დატოვოს, მაგრამ ნუ დაგვავიწყდება, რომ ის „ვალენსიას” პატრონებს ცუდად დაშორდა.
მთავარი პრობლემა კანისარესის აზრითაც გუნდში კი არა, მენეჯმენტშია.
„მწვრთნელი, მხოლოდ აისბერგის მწვერვალია”, — დაწერა მან ერთი ხნის წინ.
