გიორგი მამარდაშვილის „ვალენსიამ” „ესპანიოლთან” შინ 2:2 ითამაშა. შედეგად, „ესპანიოლი” ლა ლიგიდან გავარდა, „ღამურების” ამბავი კი ბოლო ტურში, „ბეტისთან” სტუმრად თამაშში გადაწყდება.
ვალენსიელთა მწვრთნელმა რუბენ ბარახამ ბარსელონელი კოლეგის ლუის გარსიას მსგავსად შეხვედრა უპირველეს ყოვლისა ემოციური კუთხით შეაფასა. მატჩი მართლაც დრამატული იყო. მასპინძლები ჯერ 1:0-ს იგებდნენ, შემდეგ 1:2 ჩამორჩნენ და მხოლოდ მსაჯის წამატებულ წუთებში გაიტანეს გოლი, რომელმაც ფრე მოიტანა. „რეალთან” ჩინებული გამარჯვების შემდეგ „ღამურები” ბოლო ორი თამაშია არასტაბილურად თამაშობენ, რამაც მათი მდგომარეობა გაართულა, არადა ის შეიძლება გაცილებით უკეთესი ყოფილიყო.
მატჩის შემდეგ ბარახამ თქვა: „ემოციური შეხვედრა გამოვიდა. შეხვედრის პირველი ნაწილი შესანიშნავი იყო. ასე კარგად ჩვენ აქამდე არ გვითამაშია. დავწინაურდით, მაგრამ მეტოქემ პირველივე სახიფათო მომენტით გაქვითა. შემდეგ ჩამოვრჩით 1:2. ამან დიდი დარტყმა მოგვაყენა, მაგრამ „მესტალიას” რაღაც ჯადო აქვს, რომელიც ბოლომდე ბრძოლის ძალებს გვმატებს და საბოლოოდ ანგარიში გავათანაბრეთ. ახლა, ლა ლიგაში დარჩენის შანსი გვაქვს.
როდესაც 1:2-ს ვაგებდით, სხვა შეხვედრების შესახენ ინფორმაცია არ გვქონდა. ახლა ისღა დაგვრჩენია, რომ შემდეგი თამაშისთვის რაც შეიძლება კარგად მოვემზადოთ. თამაშის შემდეგ ვარიანტებს ვითვლიდით. ჩვენ ჯერ გადარჩენილები არ ვართ. „ბეტისს” აუცილებლად უნდა გავუტანოთ გოლი.
„ესპანიოლთან” შეხვედრის რიგ ეპიზოდებში კარგად ვითამაშეთ, მაგრამ იყო რაღაცები, რამაც ჩვენზე იმოქმედა. 1:1-ზე თავს ისევ მხნედ ვგრძნობდით, მაგრამ 1:2-მა მძიმე დღეში ჩაგვაგდო. ასეთ შეცდომები მეკარეს, მითუფრო ჩვენს მეკარეს (მამარდაშვილს) არ ახასიათებს. შემდეგ მეტოქემ თავი ძალიან ძლიერად დაიცვა, სივრცეები აღარ დატოვა. საბოლოოდ, მაინც მოვნახეთ დერეფანი და ფრედ ვითამაშეთ.
სანამ ლა ლიგაში არ დავრჩებით, ვერ დავწყნარდებით. ფეხბურთი ასეთია: თამაშის დროს შეიძლება შეიქმნას სიტუაციები, როდესაც მეტოქეს სჯობიხარ, და უცებ… 1:2-ს ჩამორჩები. თამაშის დამთავრების შემდეგ ბიჭები გასახდელში ქანცგაწყვეტილები შემოვიდნენ. ჩვენ ეს ფრე დავიმსახურეთ”.
შემდეგ ბარახას მუქტარ დიაკაბის საქციელზე ჰკითხეს. ფრანგი რასიზმის საწინააღმდეგო ბანერთან ფოტოს არ იღებს.
„ჩვენ მისი საქციელი მოგვწონს”, — უპასუხა მწვრთნელმა.
