ისევ წყვილად! ლიგა 2-ის ოფიციალურმა გვერდმა 33-ე ტურის სიმბოლურ ნაკრები შეადგინა, რომელშიც ორი ქართველი გიორგი მიქაუტაძე („მეცი“) და ზურიკო დავითაშვილი („ბორდო“) მოხვდა. აღსანიშნავია, რომ ეს ზედიზედ მეორე შემთხვევაა, როდესაც საფრანგეთის ლიგა 2-ში მოთამაშე ორივე ქართველი კვირის გუნდში მოხვდა.
მიქაუტაძემ „პარიზთან“ საშინაო შეხვედრაში პენალტი გამოიყენა და „მეცს“ ქულის მოპოვებაში დაეხმარა (1:1). დავითაშვილს „ვალანსიენთან“ სტუმრად მოგებულ (2:0) დაპირისპირებაში გოლით ან საგოლე გადაცემით თავი არ გამოუჩენია, მაგრამ მოედანზე ერთ-ერთი გამორჩეული გახლდათ.
აქვე გეტყვით, რომ გიორგი მიქაუტაძე ტურის რჩეულთა შორის ამ სეზონში უკვე მესამედ მოხვდა.
