რუსთავური თრილერი

ეროვნული ჩემპიონატის მე-11 ტური მიმდინარე სეზონში ყველაზე უხვგოლიანი გამოდგა. მეტოქეებმა ერთმანეთს 20 ბურთი გაუტანეს. ჯამში კი სულ 157 გოლია გასული.

შესრულდა 3 დუბლი, რაც ასევე ერთ ტურში გატანილი ორგოლების რეკორდია. თავი დინამოელმა ზორან მარუშიჩმა, საბურთალოელთა მალელმა შეიკნე სილამ და გორელთა ბარბადოსელმა ტიერი გეილმა გამოიჩინეს.

„დინამომ“ ლიდერ „ბათუმთან“ ორ ქულამდე შეამცირა სხვაობა (მანამდე 4 იყო). ზედიზედ ორი წაგების შემდეგ,  გიორგი ჭიაბრიშვილის შეგირდებმა ერთ-ერთ აუტსაიდერ „სამტრედიას“ სტუმრად 2:0 მოუგეს, „ბათუმმა“ კი ერთობ უცნაური შეხვედრა ჩაატარა ბოლო დროს მოყოჩაღებულ „საბურთალოსთან“.

რუსთავის ტექნიკურ ცენტრში გამართულ მატჩში (მოგეხსენებათ, „საბურთალოს“ საშინაო არენა „მიხეილ მესხის“ სახელობის სტადიონი, ევროპის 21-წლამდელთა ჩემპიონატის გამო რეკონსტრუქციაშია) ბათუმელები 87-ე წუთამდე 3:0 იგებდნენ, მაგრამ დარჩენილ დროში სამი საპასუხო ბურთის გაშვება „მოახერხეს“… გამათანაბრებელი პენალტი შეიკნე სილამ მე-12 დამატებულ წუთზე გაიტანა.

ერთი მხრივ, მისასალმებელია საბურთალოელთა ბრძოლისუნარიანობა, მეორე მხრივ კი უცნაურია ბათუმელთა ასეთი უყურადღებობა ბოლო წუთებზე.

ტურის ყველაზე მოულოდნელი შედეგი ალბათ მაინც გორში დაფიქსირდა, სადაც „დილამ“ „ტორპედოს“ 5:0 მოუგო. ქუთაისელებმა მიჯრით მეორე თამაში წააგეს, 8 ბურთი გაუშვეს და არცერთი გაუტანიათ. ცოტა ხნის წინათ „ტორპედო“ თითქოს მყარად იდგა მესამე ადგილზე, ახლა კი მეექვსე პოზიციამდე დაქვეითდა.

„სამგურალმა“ ზედიზედ მეხუთე მატჩი მოიგო, ამჯერად „შუქურასთან“ – 4:1.  გიორგი ჭლიძის გუნდი მესამე ადგილზეა და მეორეზე მყოფ „დინამოს“ მხოლოდ ერთი ქულით ჩამორჩება. „შუქურა“ კი მიჯრით მეოთხედ დამარცხდა და ბოლო ადგილზეა. ცხრილის ბოლოში მყოფმა „გაგრამ“ და „თელავმა“ ფრედ – 1:1 ითამაშეს.

გაგრა 1:1 თელავი

1:0 შონია (44), 1:1 ილურიძე (63)

გაძევება: ნოზაძე (75) – თელავი

სამგურალი 4:1 შუქურა

1:0 ლომინაძე (20 პენ), 1:1 ფაცაცია (45+1), 2:1 ნიკა ხორხერლი (47), 3:1 გომეზი (58), 4:1 ჩიხრაძე (88)

სამტრედია 0:2 დინამო

0:1, 0:2 მარუშიჩი (34, 58)

საბურთალო 3:3 ბათუმი

0:1ღუდუშაური (40), 0:2 ზარია (47), 0:3 მამუჩაშვილი (73 პენ), 1:3 სილაგაძე (87), 2:3, 3:3 სილა (89, 90+12 პენ)

დილა 5:0 ტორპედო

1:0 ჩიტეიშვილი (42), 2:0 გაგნიძე (46), 3:0, 4:0 გეილი (59, 70), 5:0 ცეცხლაძე (88)

მეგოლეები: ჯოვინო ფლამარიონი (ბათუმი), ზორან მარუშიჩი (დინამო) – 7, ტიერი გეილი (დილა) – 6