საქართველოს ნაკრებმა ევრო 2024-ის შესარჩევი ეტაპი ნორვეგიასთან აღებული ქულით დაიწყო. წაგებული პირველი ტაიმის შემდეგ, ჩვენმა ნაკრებმა მოახერხა და უშუალო კონკურენტს 3 ქულა არ გაატანა – 1:1.
სანიოლის გუნდმა ძალიან ცუდი პირველი ტაიმი ჩაატარა. უფანტაზიო გუნდს ვერც ხვიჩა კვარაცხელიამ უშველა, რომელსაც ბურთი იშვიათად მისდიოდა. ნორვეგიელებმა კი, ბურთზე კონტროლი თავიდანვე დაამყარეს და 15 წუთში მარტივი გოლიც გაგვიტანეს. სორლოტმა ბურთი საჯარიმოს ხაზის გასწვრივ ატარა და ანგარიში გამოზომილი დარტყმით გახსნა.
ჩვენც გვქონდა შანსი გაგვეტანა, მაგრამ ეს უფრო ინდივიდუალიზმის ხარჯზე, როდესაც კვარაცხელიამ მოჭრილი დარტყმით სცადა შეგდება, მაგრამ ბურთი ხარიხამ აისხლიტა.
მეორე ტაიმში ჩვენებმა უფრო მოუმატეს. სანიოლის რომ გაუჭირდა, 3-5-2 ტაქტიკური სქემა 4-4-2 გადააწყო და პირველივე შეტევა გოლით დავასრულეთ. მიქაუტაძემ სკანდინავიელებს ოდნავი უყურადღებობა არ აპატია, მცველს წამით დაასწრო და მეკარესთან პირისპირ დარჩენილმა გაათანაბრა.
ნორვეგიელები გაცილებით აკადემიურ ფეხბურთს თამაშობდნენ. სწორად, ორგანიზებულად და ჩვენს დაცვას წნეხის ქვეშ ამყოფებდნენ. ჩვენები კი უფრო სისწრაფეში ცდილობნენ მეტოქის დაჩაგვრას მაგრამ არ გამოგვდიოდა. ის კი არა, ოდეგორმა 5 მეტრიდან დაუცველ კარს რომ ააცილა, მაგრად გადავრჩით.
