ნეაპოლში, საზოგადოება წილისყრის შედეგებს, საკმაოდ ოპტიმისტურად შეხვდა! აი, ლუჩანო სპალეტი კი არ ღალატობს საკუთარ პრინციპს – „ვისაც კენჭისყრის შედეგი უხარია, იგი საქმეში ჩაუხედავია…”.
ჩემი აზრით, მონაწილე გუნდის მწვრთნელის მხრიდან, ეს სიტყვები აბსოლუტურად სწორი, გამართლებულია. მეტიც, მე ვთვლი, რომ ეს არ გახლავთ “დიპლომატიური პოზა”. “მხოლოდ პაოლო მალდინის აქვს მოგებული 5 ტიტული…” – ესეც სპალეტის სიტყვებია და მოწინააღმდეგის უდიდეს გამოცდილებაზე მიუთითებს. გამოცდილება კი, მოგეხსენებათ, არასოდეს არის ზედმეტი. განსაკუთრებით, როცა ლაპარაკი ჩემპიონთა ლიგის დასკვნით ეტაპს ეხება. სწორედ ამის გამო არ მინდოდა ნაპოლის მოწინააღმდეგედ „რეალი“ ან „ბაიერნი“ და ამ ორს, თუნდაც „მანჩესტერ სიტი“ მერჩივნა.
არც იტალიური კლუბები მხიბლავდა მაინცდამაინც (შიდაიტალიური ნიუანსები დამატებითი ფაქტორია), მერჩივნა „ბენფიკა“ ან „ჩელსი“, თუმცა იმ აზრს ვიზიარებ, რომ ამ ეტაპზე ნებისმიერთან მძიმე ბრძოლაა მოსალოდნელი და თუ წინსვლის ამბიცია გაქვს თითოეულთან დასაჯახებლად მზად უნდა იყო.
ახლა მივადექით მთავარს – რამდენად მზად არის „აძური“? მჯერა, რომ წმინდა სპორტული თვალსაზრისითა და ფსიქოლოგიური მდგომარეობით, „ნაპოლი“ არავიზე ნაკლები არ არის და უმრავლესობაზე მაღლაც კი დგას! კონკრეტულად „მილანთან“ დაპირისპირებაში, ვფიქრობ, ისიც სამხრეთელთა წისქვილზე ასხამს წყალს, რომ პირველი მატჩი სტუმრად გაიმართება. ნეაპოლელთა ერთადერთი სუსტი წერტილი, ზუსტად ამ დონეზე თამაშის გამოუცდელობა მგონია. ამის მეტნაკლები კომპენსირება მხოლოდ მაქსიმალური კონცენტრაციით, უკიდურესად მაღალი მოტივაციითა და სანიმუშო ბრძოლისუნარიანობით შეიძლება. ყოველივე ეს კი, როგორც სეზონის განვლილმა ნაწილმა დაგვანახა, სპალეტის რაზმს არ აკლია!
ამას ემატება ჩემპიონატში მიღწეული დიდი უპირატესობა, რომელიც ნეაპოლელებს გარკვეულწილად ათავისუფლებს დამატებითი წნეხისგან (როგორც მინიმუმი, შემადგენლობის როტაციისა და ძალების კონკრეტული გარემოებებიდან გამომდინარე გადანაწილების საშუალებას იძლევა). იმასაც თუ გავითვალისწინებთ, რომ „რეალი“, „ჩელსი“, „სიტი“ და „ბაიერნი“ „ნაპოლის“ სტამბოლამდე ვეღარ გადაეღობებიან, ფინალი მომნუსხავად ახლოს მოგვეჩვენება! მით უმეტეს თუ მისი უდიდებულესობა იღბალი (რომლის ჩაურევლადაც დასკვნით ფაზაში არაფერი წყდება) არ შეაქცევს ზურგს. მისი უდიდებულესობა კი, მიუხედავად ჭირვეული ზნისა, ჯერჯერობით არ გვაძლევს ეჭვიანობის საბაბს!..
