„ნაპოლი” არაჩვეულებრივ სეზონს ატარებს, რაც დიდწილად ხვიჩა კვარაცხელიასა და ვიქტორ ოსიმენის დამსახურებაა. ნიგერიელმა სერია A-სა და ჩემპიონთა ლიგაში 21 გოლი გაიტანა და 5 საგოლე პასი გადააწოდა, ქართველის მონაგარი კი 13 გოლი და 15 საგოლე პასია. მოტანილი რიცხვები ნათლად მეტყველებს, რომ წყვილის წვლილი „აძურის” გამარჯვებებში დიდია. სიმბოლურია, რომ თვით გოლი-შედევრის დროს, რომელიც კვარაცხელიამ „ატალანტას” ინდივიდუალური ოსტატობის წყალობით გაუტანა, მეტოქის კარისკენ მოძრაობა მან ოსიმენის პასის შემდეგ დაიწყო.
ჯამში, კვარაცხელიამ და ოსიმენმა მიმდინარე სეზონში „ნაპოლის” მიერ გატანილი 82 გოლის 51 პროცენტში მიიღეს მონაწილეობა.
იტალიური მედია საგანგებო ყურადღებას უთმობს ოსიმენისა და კვარაცხელიას ურთიერთობასაც. კერძოდ, „ატალანტასთან” შეხვედრის ბოლოს, ყველამ დაინახა, როგორ ეწყინა ვიქტორ ოსიმენს ლუჩანო სპალეტიმ რომ შეცვალა. სატელევიზიო კამერები ნიგერიელის რეაქციას მთელს მსოფლიოს აჩვენებდნენ. ოსიმენი სიბრაზე იმით იყო განპირობებული, რომ მას აგერ უკვე ორი მატჩია გოლი არ გაუტანია, რაც მიმდინარე სეზონში მისთვის ნორმალური მაჩვენებელი არ არის. ამიტომაც შეიცხადა შეცვლა — მოედანზე დარჩენა და გოლის გატანა სურდა.
სპალეტი კი მოვლენებს სხვა გადასახედიდან უყურებს. ის გუნდზე და „აინტრახტთან” მოახლოებულ შეხვედრაზე ფიქრობდა. მას არ სურდა, რომ „ნაპოლისთვის” აღარაფრის მომცემ ბოლო წუთებში თავდამსხმელი მოედანზე დაეტოვებინა, რაც თეორიულად ტრავმის შანსს შეიცავდა.
და ყველამ მიაქცია ყურადღება ოსიმენთან ერთად შეცვლილი კვარაცხელიას ჟესტს, რომლითაც მან აღელვებული თანაგუნდელი დააწყნარა და გაამხნევა. ეს ეპიზოდი ჩვენს მიერ დართულ ფოტოზეა აღბეჭდილი.
